一講葵涌廣場，不少行街精都會即刻兩眼發光！廣場向來以貨品齊全花款多取勝，無論Budget有幾緊，都絕不會空手而回。這個細場於網上向來大獲好評，不少網民更話行一轉好過上淘寶！今次小記一於帶你搜羅網民至愛熱點，買鋪勁！
Soulmate Coffee 呷一口咖啡香
Soulmate Coffee騷媚咖啡位處小巷（Shop 2/F C20），在網上人氣堪稱爆燈！店主Nigel對咖啡充滿熱誠，在行內打滾10年後，去年與拍檔Moses開設小店，更鬼馬地以蘇眉做Logo。不少人在此嘗過一口咖啡，就馬上成為忠實粉絲，點解？因為老闆相信用心做好咖啡，客人自然Feel得到。假如拉花拉得不靚，Nigel寧願重新再做。不知飲咩？他會根據你的個人口味，整番杯「Nigel's Special」，而且店主一直同你有傾有講，有種家的溫馨感覺，加上相宜的售價，難怪吸引一班粉絲山長水遠嚟歎啡啦！
查詢：6252 5551
Hoo Hoo Baby Shop 潮媽力推
廣場不止女裝出色，連童裝選擇都一樣多，其中一樓專售日本韓國童裝的Hoo Hoo Baby Shop（Shop 1019），是不少潮媽網上熱評的心水之一！原因無他，一來貨品多元化，二來用家仲可以於網上甚至以facebook買個夠，之後大家仲有得揀郵寄或店內交收，方便周到，自然買得爽手啦！
查詢：9133 7520
古著街 闔府型爆
香港不少店舖都引入日本最新時裝，而開業8年的古著街Kunze × toyko（Shop 3132）則專入「舊貨」，店舖主打日本風的古着服飾、潮鞋、手造皮包、飾物等，吸引不少潮人掃貨，而店舖另一賣點係加設童裝Size，不少潮爸潮媽自己入貨時，順道揀件仿古着Tee畀仔女，全家人齊着古着親子裝，型到爆！
查詢：3156 2956
Hanapepe 獨家瀛着
除咗網民推介外，其實廣場都有不少一講就知的龍頭舖，好似開業16年的Hanapepe（Shop 2/F 83A），專營日本Smart Casual少女服飾，獨家代理tophat、babywis等日本潮牌，最新更引入原先在連卡佛坐鎮的Sanatorium，小店如斯大有來頭，難怪多年來屹立不倒。現時全店正舉行夏日八五折減價，咪走寶呀！
查詢：2485 3616
10 cm Fashion 男女通殺
有時外國的月光未必特別圓，香港本地潮Tee品牌McBoy（Shop 3113）就選擇於廣場落腳，她們的代表作是肥版麥叔叔系列，久不久都見本地潮誌報道。舖面選擇固然多，再不然還可以在圖庫內揀圖案，訂製心水Print Tee。
查詢：2377 1509
飲盡東南亞
來到葵涌廣場，絕對不可以錯過三樓、廣場中最有名的小食街，由地道魚蛋燒賣到台式辣肉腸、重慶酸辣粉、撈撈小食、串燒、滷水小食、日式小丸子……應有盡有，而最貼心是不論食邊樣，都維持廣場一貫的特色：平靚正！其中冰冰果汁（3/F電梯旁）可說是當中的老字號，無論台式、港式或地道飲品都有提供，而且價格超平，幾蚊飲盡東南亞飲品，不再是Cold Call廢話！
一店兩面睇
Ho Fashion（Shop B10A）舖面分兩部分，一邊賣女裝，而另一邊就專售仿古歐洲木箱，所謂物以罕為貴，老闆娘每件衫都只是一件起兩件止，幾好賣都不會再返貨，而且又經常換款，務求令客人不會撞衫。至於鍾情家居擺設的朋友，Fancy又實用的仿古木箱就最啱，不過同樣係賣完未必再返貨，有買趁手。
查詢：2410 0116
搶眼手提袋
開張只有兩個多月的MerCi（Shop 72 3/F），專攻日韓時裝同飾物，衫褲鞋襪以外，還主打特色手袋。日本品牌「Spia Ceri」的尼龍手提袋，質料防水輕巧，顏色鮮艷，dot柄格仔圖案夠晒搶眼，襯衫必備！
查詢：2421 3668
簡約迷人
於Hanapepe除了會找到一些花俏款式，其實店內還有不少簡約款式選擇，適合不同女生喜好。
女裝亦掂
作為本地薑，10 cm Fashion不止售賣McBoy的產品，店主拍檔亦有自家生產另一女牌Mesui，實行一間舖、男女通殺。
