講開茶餐廳，點能夠唔提絲襪奶茶！茶、牛奶出身背景不同，質地、味道亦完全唔似，偏偏一撞埋就係人間絕配，顛倒眾生，更加係港式茶餐廳的靈魂。好一杯奶茶，據說香港人一年就飲10億杯，數目驚人，連帶訪港旅客亦慕名要試「絲襪奶茶」，有望令這「名物」向世界出發。

2009年，一場《國際金茶王大賽》，令奶茶即時升呢，連帶沖茶師傅、店子也一舉成名，變成搶手貨。像個人組冠軍陳偉聰，賽後即被高薪禮聘到澳門工作；公司組金獎大發餐廳成為長龍店；同組銅獎鄭記士多的$68奶茶，亦為人津津樂道。今年除繼續舉行《國際金茶王大賽》，亦新增《金茶王大賽》青少組比賽，反應同樣熱烈。以下就請幾位奶茶粉絲講講心中至愛。

「美心香港地」趙師傅	鄭記士多鄭汝雄	少年食神米高

來回沖撞先夠滑

「靚奶茶色香味俱全，茶色鮮紅，有茶味，飲落滑口。沖奶茶唔易，茶葉要幾種溝埋用，火候、時間要掌握好，而且奶、茶比例適合至得。」

靚茶葉配好手勢

「奶茶要夠香夠滑有茶味，做得好有竅門o架，我覺得揀靚茶葉最緊要，但其他好似沖茶手勢，時間掌握都唔可以忽視。我有同金茶王冠軍請教絕技，佢只係答我工多藝熟，就係咁簡單。最鍾意石硤尾蘇記茶檔、灣仔蘭芳的奶茶。」

用水最重要

「我出品的奶茶有茶香，幼滑順喉，而且After Taste維持三個鐘，好多人試過都讚。水係生命之源，沖奶茶的水最重要。我認為最好的奶茶有幾間，好似長沙灣新華茶餐廳、上環瑞記及西環科記。」