記得當年《StarCraft》第一集推出時，筆者跟幾個同學喺學校宿舍一齊玩連線，原來眨眼間已經過咗12年。雖然咁多年嚟《StarCraft》人氣不減，仍然係國際打機大賽指定嘅RTS對戰遊戲，不過都係時候出新版本「回饋」機迷，開發經年並在今日推出嘅《StarCraft II：Wings of Liberty》便用上1億美元打造，認真誇張！

第一集《StarCraft》在98年推出，至今銷量高達1,100萬套，係全球最好賣嘅PC遊戲之一。《StarCraft II》原定於09年推出，但由於開發公司Blizzard為求令效果做得盡善盡美，所以延遲到今年2月先開始公測。《StarCraft II》開發預算用咗成1億美元，雖然今次新Game開價$500以上，但可以玩足幾年，拉勻都唔算貴。

兵種改良有新鮮感

《StarCraft II》故事延續自同樣在98年推出的遊戲資料片《Brood War》，多位第一集出現過嘅主角都會一一現身，而故事主軸就圍繞着叛軍領袖Jim Raynor。始終《StarCraft》Fans眾多，不少第一集出現過嘅戰場都會重現眼前，另外再新增其他地圖，玩落既親切又有新鮮感。今集仍然係由人類（Terran）、神族（Protos）同蟲族（Zerg）三大種族展開大戰，但由於故事有所不同，出現的兵種也有顯著分別，就算係同一類兵種都會被賦予唔同技能，例如神族狂戰士（Zealot）一出場已經係快速兵種，可以直衝向敵陣攻擊遠程武器。

買英文版挑戰全球高手

《StarCraft II》玩法雖然跟第一集冇乜分別，靠搶奪資源去建造各種建築物、軍隊同升級，然後集合兵力剿滅敵人。但今集在遊戲平衡度方面做得更好，而且節奏更明快，玩落更刺激；另外遊戲亦用上全新3D圖像處理引擎，部隊、地形變得更靚更仔細外，甚至在大規模戰鬥時亦有非常流暢的表現。《StarCraft II》會推出英文版及中文版，雖然同樣可透過Battle.net配對機制去搵對手，但英文版跟中文版會連上不同伺服器，中文版Server主要係開放畀中、港、台玩家，想挑戰全球《StarCraft II》高手都係買英文版較着數。

機檔案

類型：即時戰略

開發：Blizzard

平台：PC

推出：7月27日

售價：$539（英文版）