雖然《鐵甲奇俠》第2集好唔好睇就見仁見智，但對玩具商或玩家嚟講，都肯定係個大寶庫，因為唔計War Machine、Black Widow同鞭狂，淨計Iron Man本身已經有3個版本；繼Mark Ⅳ後，Hot Toys終於加推Mark Ⅵ，而且一個價錢就有齊正常及戰損版兩款造型，HT今次算係幾益粉絲喎！

落足工夫周身傷

唔少玩家鍾意自組場景，不過歷代Iron Man人偶都「身光頸靚」，要玩戰爭Feel就要自行加工。HT嘅Mark Ⅵ就為大家慳返唔少工夫，事關造型參照電影最後一幕，無論頭像、胸甲都布滿傷痕及子彈窿，部分關節位仲見到零件外露，論「受襲」程度，比Mark Ⅲ嘅「戰損版」仲要嚴重。驚重手得滯？唔怕，隨盒有多一套冇花冇痕嘅正常版配件，包括一個頭像、胸甲、左手及大腿機械蓋，換齊即刻靚仔晒，換句話說，一個價錢、兩款造型，抵玩！

隨盒有齊正常版及戰損版兩款造型，但係Body得一個，玩嗰陣只能二選一。

放大圖片

VIP再送左前臂

話明係大改造，除咗傷痕，Detail位都重新執過，好似心口嘅核能裝置由圓形變三角形，仲可以同雙眼及雙掌一齊着燈，前臂又多咗Laser炮，只要手掌向下微曲，就會自動喺手背彈出。頭雕方面，繼續由韓籍大師Kojun操刀，但現階段仲等緊羅拔唐尼及電影公司審批，因此拍攝當日連「樣」都未有得睇。特別一提，凡VIP會員均可獲贈Mark Ⅵ嘅左前臂一隻，可以套喺其他TrueType Body玩角色扮演。

頭盔都有兩款，原定揭開戰損版嘅面蓋，就可見到Tony Stark頭雕，不過面相仲等緊佢老人家審批。	放大圖片	手腕微曲，就會彈出Laser炮。
Mark Ⅵ嘅心口換咗「三角嘜」，着燈當然唔慳得。	Mark Ⅲ戰損版嘅雙臂只有少少傷痕，今次就連零件都露埋底。	腹部並非一件過啤膠，設有關節可以彎腰擺甫士。
附件包括4對更換式手掌及專用地台，地台仲有Navy Drone殘骸，跟足電影場面。

查詢︰2388 4677（玩具狂熱）