去年o靚模「騎劫」書展，今年大會就出招謝絕各式賣肉簽名會，做法啱唔啱就見仁見智，但至少逛書展時都唔使同娛記及龍友埋身肉搏，就肯定輕鬆好多。當然啦，每個人入書展都有唔同理由，不過後生仔女多數Buy有噱頭和以明星招徠嘅新書，加上今年有現時最興嘅電子書同必掃精品，各位Fans肯定要帶多些錢入場啦！\
年輕人啱睇
小克
《http://www.bitbit.com.hk》
出版社：三聯
聾貓可以暫時抖吓唔使搞爛Gag，今次由bitbit擔正大旗做主角，漫畫裏面講bitbit在虛擬網絡世界嘅生活，當然唔少得小克式笑話；不過想話畀大家知，照打書名上嘅網址係無嘢睇o架！
米朵拉
《影子戀人》
出版：青藍
內地興起校園青春小說作家潮，米朵拉都可算是其中一位人氣甚高的代表，在中港台都幾有知名度；今次她更趁香港書展來港推介新書《影子戀人》，分為上下兩冊，值得留意。
伊維特
《伊維特歌劇院》第二版
出版社：萬里
DJ E記（伊維特）首部個人作品集《伊維特歌劇院》，結合陰沉嘅短篇故事及充滿黑色風格嘅手繪畫作，相當獨特；為書展而出嘅第二版更加入新故事及換上新封面，保持新鮮感。
王貽興
《什麼口感》
出版社：日閱堂
「雞有雞味」與「好有口感」即係點？王貽興在《什麼口感》寫起飲食文章，用具體描述訴說各種生活之味，並非「這食物很有口感」這類空泛的論述。
萬寧妹妹（王允祈爸媽主理）
《我有少少鍾意咗佢》
出版社：青春文化
「我有少少鍾意咗佢」係萬寧妹妹電視廣告嘅金句，但當然呢本同名新書唔並係由萬寧妹妹執筆，而係由王爸爸同王媽媽主理，分享允祈嘅成長故事，清新又感動。
林一峰×陳曉蕾
《聽大樹唱歌》
出版社：萬里
Chet Lam今年出書暫且放低旅行跟音樂，與陳曉蕾合著講環保書籍，分享自己嘅低碳環保生活；而且新書更以大豆環保油墨印製，一定要支持。
追星族必入
官恩娜
《官恩娜，原來妳......》
出版社：嘉出版
新書《官恩娜，原來妳......》就由Ella親自剖白入行經過、個人經歷同感情生活等，睇完本書應該可以發現到更實在嘅官恩娜。
鄒凱光
《撈碧刁》
出版社：天窗
「撈碧刁」係英文「No Big Deal」嘅中文諧音，從書名已可見到玩嘢之處；每個篇幅都以金句帶起，並且由兩大金句王黎明同黃興桂寫序，有噱頭！
傅穎
《如果你是我》
出版社：青春文化
唔經唔覺，新書《如果你是我》已經係Theresa第5本繪本散文圖冊，從中分享從未曝光嘅靚相同秘密，忠心Fans必買！
王貽興
《旅人形．江戶亂步》
出版社：日閱堂
才子王貽興將佢旅居東京3個月間體驗道地日本生活後，感受到幻想與現實之間落差的經驗寫成書，東京除了「血拼」外還可以有更多可能性，大家可跟隨王貽興的步伐賞玩日本。
阿四媽媽
《娛樂陰陰濕》
出版社：皇冠
上一本已經講出藝人助手生涯苦與樂嘅阿四媽媽，今次就大爆娛樂圈生態同藝人嘅秘聞，啱晒八卦嘅讀者。
勁谷電子書
雖然唔使入場都可以上網Download到電子書，不過今年大會就首設電子書展示專區，讓讀者免費體驗！雖然話電子書好多都係由舊書「移植」，不過由於電子格式可以加入更多互動功能，例如江記《飯氣學園》之《拉低你的笑點》就在部分漫畫上，刪除對話框內嘅文字，等大家自己填上對白及上載作品，都幾得意o架。
免費體驗
部分新電子書名單
江康泉《飯氣學園》／0.99美元
C君《大C想家》／2.99美元
Pazu薯伯伯《風轉西藏》／2.99美元
錢瑪莉《穿Kenzo的女人（上、下）》／每冊3.99美元
John Ho《John Ho少年事件─成長的快樂與輕狂事》／5.99美元
鄭幗恩《北海道太陽花傳說》／2.99美元
Hot Picks
入得書展，都會買番啲特別版精品，好似每年麥嘜、麥兜產品都好受歡迎，今次更出埋可愛到震嘅iPod套同Netbook袋，但筆者更鍾意寫住個「頂」字嘅麥兜傳意公仔匙扣。另外Chocolate Rain亦會交叉林一峰，以插畫跟音樂重新演繹經典作品《小王子》成為《返回星空》，而且同場會出埋不少別注精品，必掃！
追星簽名會
去書展買書，最好當然搵埋明星作家簽名留念，咁粉絲們就要記低下列時間！
作者 日期 時間 位置
HotCha 7月21日（三） 下午1:30 簽名會A區（君爵廳1）
傅穎 7月21日（三） 下午4:30 簽名會A區（君爵廳1）
王貽興 7月22日（四） 下午6:00 簽名會B區
陳柏宇 7月23日（五） 下午3:00 簽名會A區（君爵廳1）
官恩娜 7月24日（六） 下午3:00 簽名會A區（君爵廳1）
伊維特 7月25日（日） 下午1:30 簽名會A區（君爵廳1）
林一峰 7月25日（日） 下午1:30 簽名會A區（君爵廳2）
小克 7月26日（一） 下午3:00至6:00 簽名會B區