驚慄科幻片《鐵血戰士S》終於上映，好唔好睇見仁見智，有人覺得好血腥，亦有人話劇情超爛。不過姑勿論拍成點，一眾血獸Fans晨早將注意力放喺周邊產品上，最注目一定係Hot Toys炮製嘅血獸大佬Berserker，足足14"高，夠晒嚇鬼！

高元祖成個頭

《鐵血戰士》同《異獸戰》都算得上係HT最好賣、兼升值潛力最勁嘅產品線，唔計半胸像、全身像，單係1/6 Figure已經超過10款，仲衍生出女版She Predator，到底出完未？《鐵血戰士S》正好為HT注入新元素，率先登場嘅係血獸隊大佬Berserker Predator，面相夠晒樣衰兼兇殘，仲設有開合兩副牙骨，神態捕捉得唔錯。而且Berserker屬於血獸中最強悍嘅一族，體形比元祖血獸（Classic Predator）更高、更大隻，所以HT專登整咗個14"Body，拍埋舊血獸身邊，幾乎高出一個頭，氣勢殺晒！

事先張揚 除咗Berserker，HT喺今年動漫節仲會推出Guardian Predator會場限定版，造型跟番第2集，送埋氧氣罩、外星怪獸骸體及長矛等豐富配件，每套售$1,180。	Body有成14吋、35cm高，比標準1/6 Figure高成個頭，不過關節得番22個，擺甫士總係差啲。	左邊膊頭設有加農炮，可以有限度咁左右擺動。

蜥蜴皮最難搞

除了大隻咗之外，Body組裝同以前有好大分別，舊版經常將胸、腹分開處理，今次上身就披咗一層軟膠，據造型師Joseph Tsang表示，咁做可以避免關節外露，令整體嘅皮膚紋理趨向一致。Joseph又透露，新血獸由設計到首辦完成，足足花咗三個幾月，皮膚上嘅蜥蜴紋理，仲係人手逐刀雕琢出嚟，而且今代血獸嘅顏色有強烈對比，塗色方面用咗好多工夫。配件係唯一嘅不足之處，除咗一對手掌及一副人類骸骨外，就只有面具及三把手刀替換，玩慣大堆頭配件嘅Fans未免失望。特別一提，今集另外三隻血獸亦會陸續登場，買齊全套嘅話，一定炒得起！

每隻血獸例牌有個Jacklock頭，身為血獸大佬當然唔少得，呢部分用軟膠製成。	Zoom埋啲睇，皮膚上嘅蜥蜴紋真係好鬼複雜，難怪造型師話係最困難嘅製作部分。	放大圖片
右手可以裝手刀，不過唔似電影咁識得伸縮，長短要自行更換。	今集血獸愛打拳腳交，高科技武器欠奉，配件自然少得可憐。

查詢︰2388 4677（玩具狂熱）