今時今日買波鞋,某些大牌子可以任你自選皮料和顏色,襯出至啱個人心水的潮味配搭,原來出車都可以咁玩,而且並非售價動輒七位數字起的豪車專利。香港網上專售、限量10輛的MINI One Ray,除有兩種車身顏色,就連指揮燈殼和側鏡冚的配色都有得揀,如此整色整水,無非想每位車主都稱心滿意!
並非想翻舊帳,不過以前出MINI One,由於是入門版關係,全車配色都是原廠指定,未必盡如人意,最新推出的MINI One Ray就親民得多。首先車身顏色除有今次測試的「Dark Sliver」,還有「Pepper White」畀你揀,這兩種顏色首次出現在MINI One身上。此外,側鏡冚和指揮燈殼還有粉紅、橙、綠、黃和藍五色選擇,點襯先算靚?完全由你話事。
好力咗! 升級1.6
除了車身配搭有新意思,性能規格亦有驚喜。原本的MINI One採用1.4公升引擎,今年就升格為1.6,改善了力量輸出,特別版MINI One Ray又豈會行回頭路?1.6公升直四引擎配六前速自動波,馬力和扭力值分別是98hp和15.5kgm,雖然未算力量澎湃,但與1.4相比,起步明顯爽快了,以後在燈位起步,不用再次次食塵。至於98hp馬力亦足夠驅動這款小汽車,只要乘客連司機的四位仁兄,並非全是200磅過外的大肥佬,還是應付有餘的。
手快有! 網上訂購
可以自選顏色,又有充足性能「十卜」的MINI One Ray,售價只是$199,900,而且出自歐洲名門,價位實在吸引。若想成為MINI One Ray的車主,就要鬥快出手了,因為此車只在香港的MINI Online Store作網上訂購,而且限售10輛,額滿即止。想預先試試各款顏色配搭的效果,甚至「扑錘」出車的話,就要快快上www.minihk.com瀏覽了。
車檔案
車 型:三門四座位揭背車
引 擎:直四
容 積:1,598c.c.
最 大 馬 力:98hp/6,000rpm
最 大 扭 力:15.6kgm/3,000rpm
驅 動:前置引擎、前輪驅動
傳 動:六前速自動波
0-100km/h:12.3秒
售 價:$199,900
網 址:www.minihk.com
查 詢:3193 6808(MINI HK)