浸大E神Carol近期成為風頭躉，寫真集又玩冰鎮又玩浮波，勢要「胸」戰一眾o靚模。不過書展未到，她就選擇另類方法「空」襲對手，講繄嘅係Parrot最新Wi-Fi遙控直升機AR.Drone，一部iPhone就包辦飛行、盤旋及攻擊多個動作，而且遇有障礙物仲可以立即停飛，保證唔會直墜維港！

將iPhone變身成遙控器唔係新鮮事，App Store早有大量程式供應，但講到好玩，就一定唔及這部Parrot AR.Drone。事關佢係全球首部應用實時編碼技術（Augmented Reality）嘅遙控直升機，早喺今年CES示範表演時已引起廣泛回響。今天率先在本港發售，小記即刻試吓佢有幾好玩！

打「空」戰我至耍家！	iPhone變身遙控器，左手控制方向，右手控制升降，並支援體感操作。	拆走大包圍，換上流線形機艙，變身戶外形態，飛得更快！

畫面實時串流

表面睇AR.Drone，結構同一般模型飛機冇乜大分別，都是由駕駛艙及4個螺旋槳組成，前者物料係碳纖維及強化PA66塑膠，點撞都唔爛，後者則內置無刷發動機，透過捲動空氣便能上落升降。不過其內部結構就複雜得多，例如MEMS微機電系統、三軸加速器、雙陀儀等等，而操作靈魂就落在兩組鏡頭上，一組在機身前方，可把影像實時串流至iPhone屏幕上，路直路彎都能避開障礙物；另一組鏡頭則設在機底，能與超聲波感應器連接並分析高度及速度，令機身飛行更穩定。

前方設有93度超廣角鏡頭，可把影像實時串流到iPhone屏幕，不過女士唔留意就好容易被高抄偷拍！	放大圖片	底部設有垂直鏡頭及超聲波感應器，兩者互動便能保持飛行穩定。

體感直覺操作

雖然設計咁精密，但估唔到操作咁容易。玩家只要安裝《AR. Free Flight》程式，就有兩個控制介面，一個係初學模式，左手控制向前、向後及掟彎，右手則控制升降及盤旋。另有AS專業模式，支援體感操作，例如向右傾側iPhone，直升機就會向右飛行，操作完全直覺，唔似一般模型飛機要同時控制油門、副翼咁複雜。Carol初時都玩到「o依嘩鬼叫」，但唔使幾分鐘就舞動自如，仲教番我只要按「緊急着陸」掣，引擎便會立即停止，唔怕撞機傷及無辜！

用番一般模型飛機鋰電池，容量有1,000mAh，不過叉90分鐘先玩得12分鐘，唔多夠喉喎！

只要在機頭貼上三色貼紙，兩部AR.Drone就認到對方，然後再用虛擬飛彈互片！

流線機艙單挑對手

至於玩家最關心嘅速度問題，AR.Drone時速達18公里，並可爬升至6米高度，雖然冇一般模型飛機咁高咁快，但反而更適合室內飛行。為此佢可變身成兩個形態，喺室內飛時可加裝發泡膠大包圍，卸去撞擊力；戶外飛行時則可換上流線形機艙，令風阻更低，飛得更快。另外，只要在前方貼上三色貼紙，兩機便能偵測並攻擊對方，真實好玩過第一身射擊Game！AR.Drone將於今明兩日於海港城SportX舉行示範表演，有興趣的話亦可到facebook.com/ARDrone了解更多詳情。

機檔案

遙控範圍︰50m

飛行高度︰3m

飛行速度︰18km/hr

體　　積︰52.5×51.5cm（室內）45×29cm（室外）

重　　量︰400g（室內）、360g（室外）

前置鏡頭︰93度超廣角CMOS 640×480解像度

垂直鏡頭︰64度CMOS 176×144解像度

兼容裝置︰iPod Touch、iPhone、iPad

對外連接︰IEEE 802.11b/g

電池充電時間︰90分鐘

查詢︰2736 1733