夏日炎炎，沙灘、船河、Wakeboard…一班老友落水玩鬼咁開心，只不過玩親水都要放低部電話，有重要來電卻懵然不知！好彩近年日系廠商每逢夏天，都會推出大量防水手機應市，好似新登場嘅SoftBank 944SH，就支援IPX7防水標準，1米水底下都可照煲粥兼收發SMS！

雖然Motorola及Nokia以前都出過三防手機，但其防水功能只做到「防水濺」，落雨天帶出街用還可以，若想落水煲粥就一定報銷收場！相比起來，日系手機廠更鍾意玩潛水，唔單止入水能講、出水能拍，花臣、款式仲零舍多選擇，而今夏芸芸新機中，又以SoftBank 944SH最好玩！

激潛1米 玩30分鐘

IPX級數係國際防水標準，一般防水Gadget至少達到IPX5，起碼唔怕被淋濕。944SH唔單止做到呢點，仲支援埋IPX7級數，即係在常溫1米水深下，仍能正常運作30分鐘！小記將手機放入水中，唔單止收到訊號，有來電時鈴聲一樣照響，以後聽見耳筒傳來「咕嚕咕嚕」嘅回應，話唔定朋友真係潛緊水接聽你電話！講得電話，收發SMS當然冇問題，惟留意佢雖然認到8成漢字，但就冇中文輸入法，入漢字要靠50音，情侶互Send短訊就要焗住打英文了！

8MP CCD 入水美顏

電話都傾到，水底攝影自然難佢唔倒。呢方面手機搭載了800萬像素鏡頭，雖然解像度不及其他千萬像素的日系對手，但其感光元件就用咗CCD，先天成像質素已好過CMOS多多聲！而且仲支援29mm廣角及ISO 12800超高感光度，就算浮潛時唔夠光都可捕捉到魚群游過的情景。其他分唇還包括人臉對焦、一笑即拍、100張連拍及自動光暗修正等，最正係有埋美顏模式，幫相中人瘦面、美白兼加大雙眼，就算冇戴大眼Con一樣影得靚靚。

3吋外屏 出水變鏡

944SH日本又名「mirumo 2」，有鏡面含意，所指嘅係佢個3吋水銀外屏。上代934SH都有呢個屏幕，但只能顯示日期及時間；今次就來個大躍進，直接搬入手機Menu，不單可以睇短訊、查天氣及播放音樂，還內置了計步行，計住每天步行時所消耗嘅卡路里，女士Keep Fit必備！另外，上代被激讚的「Mirror」功能亦保留下來，按個掣屏幕即變成化妝鏡，在沙灘補妝都神不知鬼不覺！

其他濕身推介

手寫繁中DoCoMo F-06B

唔好以為1米防水就好叻，F-06B仲厲害，防水級數達到IPX8，可在常溫下潛落1.5米水深玩30分鐘，為目前防水能力最高嘅日系手機。拍攝硬件更達到單反級數，可影1,320萬像素相片及拍1,080p高清短片，配合90度旋轉屏幕，簡直係槍型DV上身。不過佢最強之處還是中文輸入，有筆劃、拼音唔出奇，仲可以手寫入繁中，曬住太陽都能喪打SMS。

直駁高清DoCoMo SH-07B

跟944SH同為Sharp出品，亦擁有IPX7防水級數，不過SH-07B的拍攝能力就更強，唔單止鏡頭高達1,210萬像素，還支援1,920×1,080p高清拍攝，透過出名靚嘅AQUOS屏幕，睇片一定靚爆鏡。若嫌屏幕太細，機側還提供Mini HDMI插槽，可把畫面直駁高清電視欣賞，無論珊瑚定美眉都睇得一清二楚。

百搭防水套DiCAPac

夏天得幾個月，若然只為游水而買部防水手機好似唔多划算，其實只要買個防水套，就咩機都可以放落水用。DiCAPac呢幾款防水套便專為手機而設，只要將套口封實，便能抵受10米水壓，最正係佢送埋個IPX8級防水耳筒，經套上小孔便能插入手機，衝住浪時聽住勁歌，爽死！

專家教路

要揀廣角鏡頭

若只是一般浮潛，防水手機嘅影相效果跟DC唔會有好大分別。另外，水底會折射光線，令目標變得又大又近，所以最好揀有廣角鏡頭嘅型號，拍攝時便可納入更多景物。

用完記得沖身

最緊要每次浸水後，即刻用淡水沖洗機身表面，以免沙粒或鹽分藏於隙縫內。另外，蓋好電池蓋後記緊啪埋個Lock掣先好下水。

機檔案

制　　式︰ GSM三頻、WCDMA

內置屏幕︰ 3.2吋1,677萬色ASV，854×480解像度

外置屏幕︰ 3吋單色

鏡　　頭︰ 800萬像素CCD

記　憶　體︰ 內置104MB、

支援microSDHC記憶卡（最高16GB）

對外連接︰ 藍芽2.1、IrDA 1.3、Wi-Fi

防水等級︰ IPX5、IPX7

通話時間︰ 200分鐘（2G）、200分鐘（3G）

備用時間︰ 270小時（GSM）、310小時（3G）

體　　積︰ 110×51×17.5mm

重　　量︰ 139g

查詢︰（a）2374 0618　（b）2361 7228