大型商埸來來去去都是公式化的連鎖店，行得多，人都悶。幸好與銅鑼灣時代廣場一街之隔的耀華街，近年有愈來愈多小店進駐，包括型格時裝樓上店、狗仔美容店、人氣造鞋小店及咖啡店等，不少潮人最愛在這裏又食又買，仲帶埋狗仔扮靚靚，Hea足5粒鐘。

1:00pm 第一站‧Jules型格潮服

首站是街頭的樓上店Jules，由兩位時裝人共同創立，主要引入韓國數一數二的時裝品牌W. Dress Room及Dress Monster、台灣新進潮牌Lin Chih Chieh及本地飾物品牌Avantink，一律走型格路線，而部分貨色更是獨家發售。今回，值得留意有Jules × Lin Chih Chieh的合作版系列，以復古與時尚為題，設計玩新舊布料拼貼，每款只得一件！

Jules × Lin Chih Chieh的合作版系列拼貼上衣 $980、Urban Blues Newyork高腰牛仔褲 $831、Ecrin Project黑色鞋 $560	店子雖小，但貨色勝在夠特別，加上店主好客，任你試啱先買！	Lin Chih Chieh淺灰色皮背心 $3,833
Lin Chih Chieh黑色雪紡百褶裙 $1,769	Avantink鏈扣設計手鏈 $980

地址：耀華街４號２字樓　查詢：2834 7399

2:00pm 第二站‧DogoSpa狗狗大晒

正所謂今時唔同往日，狗仔都需要扮靚靚先出得大場面。專為狗仔而設的DogoSpa正好提供一站式洗剪吹美容Spa服務，有日籍專業寵物美容師駐埸，幫狗仔沖涼兼恤髮，收費就按狗仔種類而定，以最受歡迎的玩具貴婦狗為例，沖涼連剪毛由$800起，深層清潔Micro Bubble Spa Treatment則由$100起，行開這邊記得帶埋愛犬扮靚靚啦！

模特兒拍攝當日帶埋松樹狗來做深層清潔！	日籍專業寵物美容師悉心為你的愛犬恤靚髮，你滿意才收貨。	寵物礦物泡泡液$168
薑餅人公仔 各$62-65	狗仔軟墊各$288	放大圖片

地址：耀華街25號丹納中心地下２號舖　查詢：2836 5001

3:00pm 第三站‧Shoe Girl訂製女鞋

狗仔店隔籬有間粉紅色小店Shoe Girl，於2004年成立，以度身訂造鞋款冧盡一班OL及闊太。由於鞋履均選用優質的羊皮、蛇皮及意大利布料，配以西班牙製造的防滑鞋底，鞋墊更倣效波鞋的氣墊設計，舒適度達100%，難怪日本、台灣及新加坡客仔都會專程飛來訂購。值得一提，海外客仔訂購鞋款，只按照郵局郵寄服務收費，而不會額外徵收郵寄費用，相當老實。

有專人為你量度尺寸，服務一流！	店內超過50個鞋款，任揀任造。	揀啱鞋款後，可以揀選心水皮料、鞋形及鞋踭。
至抵着的羊皮平底鞋$630，款靚料靚!	放大圖片

地址：耀華街35號地下　查詢：2834 1023

4:00pm 第四站‧caffe kenon歎啡食撻

行足三小時，雙腳開始有點攰，建議到街尾的caffe kenon坐吓歎杯咖啡食件Cake補充能量。這裏獨家供應與店舖同名的咖啡，味道香濃。另外，這裏更設有酒牌，喜歡飲酒的朋友，不妨飲番杯Novus意大利啤酒，成個人都鬆晒！

三五知己或是一個人坐低歎杯咖啡食件Cake，夠你Hea足兩小時。	朱古力泡沫咖啡 $29、烤芝士番茄三文治 $35	caffe kenon咖啡粉連杯套裝 $200
鮮果撻 $24	店裏店外以紅白色打造，潮味十足。	放大圖片

地址：耀華街39號南慶坊地下　查詢：2890 1818

Best Pack

雪紡豹紋長裙

新進韓國時裝品牌W. Dress Room，價錢合理玩得過之外，更以玩味風格及獨特剪裁殺入潮界。小記推介這條粉紅色豹紋長裙，若隱若現的雪紡布料設計，好Sexy！

W. Dress Room粉紅色豹紋長裙 $520

Freeze Dry Chicken健康狗零食 $58

狗狗食雞肉乾

想狗仔健健康康地成長，除了提供一個舒適的居住環境之外，均衡的飲食亦相當重要，買包Freeze Dry Chicken健康狗零食，獎勵一下愛犬都不錯。

舒適童裝鞋

Shoe Girl近年加入童裝鞋款訂造服務，同樣以優質的物料及舒適為大前提，對象是0至3歲的小朋友，等你同寶貝仔女可以母女或母子裝逛街街。

各款童裝鞋各$450-480

Espresso特濃咖啡$10

$10歎Espresso

自問是咖啡精，就要試試caffé kenon的Espresso特濃咖啡，以意大利傳統的製法，咖啡豆味道極香濃，只售$10一杯，價錢相當吸引。