S.man：

天氣爆熱，特別容易心火盛，做咩都好似唔多如意，未知是否嘆氣聲充斥四周，終於搞到隔籬位同事@Angelamamy睇唔過眼，回家親自煲製愛心涼茶給我降降火。甘甘甜甜的自家製滋味，飲完成個人「Gur」晒，要多謝你為我的躁爆工作間帶來一點甜。下星期五大暑，@Angelamamy呀……如果有冬瓜薏米水消吓暑，你話幾好呢呵！

金枝：

4月在紅館睇陳奕迅演唱會，我數住，全晚我感動到喊咗七次。上星期買番DVD重溫，還以為睇碟會同現場感覺差一截，但結果感動位、喊位更多，最估唔到的喊位不是熱門情歌如《無人之境》、《葡萄成熟時》，而竟然係《今天等我來》，仲要係睇咗咁多次喊咁多次！才發現直到現在，歌詞所說的「今天等我來，就讓這遊子的心寫出好題材。」仍然是我寫作的信念。

Angelamamy：

住在新界區5、6年，雖然返工出街搭車搭到悶，但是空氣夠清新，附近又多嘢食。最鍾意幫襯樓下一間連鎖式甜品店，並非貪其好食，而是夠就腳，不過最近其出品質素不斷下降，索價40多元的棉花冰，入口又粉又冇果味，簡直可以用難食形容。為免影響精明消費的師奶稱號，如此物無所值的食店，一定不再惠顧。!