近期因為隻《New Super Mario Bros.》中文版，帶返起Wii嘅主機同遊戲銷情，呢隻主打Party Game嘅日版《Wii Party》真係出得合時。《Wii Party》總共收錄咗超過80款Mini Game，內容相當豐富，而且玩法非常多元化，例如聽聲鬥快搶Wiimote手掣就好有創意，一於約埋三五知己齊齊玩！

今次《Wii Party》出現嘅角色全部都係Mii人物，如果玩家本身已經為自己同朋友製作咗Mii頭像嘅話，相信會玩得更投入，不過電腦都提供咗唔少現成Mii角色畀大家揀，唔使畫都有得玩。

四人鬥快搖Wiimote切蔬菜，要同真人玩先至緊張。

支援四人同時玩嘅「康樂棋」，當中仲會加插唔少Mini Game整鬼你。

80多款Mini Game

近期都好少呢類大玩Party Game嘅遊戲推出，好似《Wii Party》咁一嚟就收錄80幾款咁多，就更少見。當然這類大家一拎上手就識玩嘅Party Game，都預咗難度唔會高，通常只會玩一啲簡單嘅遊戲，如搖Wiimote加速跑步或切菜、利用Wiimote做出平衡動作、又或者用方向鍵控制角色的移動方向。

「平衡船」好考玩家嘅合拍度，擺錯公仔嘅位置就好易翻船。	今次唔係用數字嚟玩「BINGO」，而係換成Mii頭像，睇到眼花。	今次仲唔畀我搶贏你!

新舊玩法都有

遊戲共分為「定番Party」、「Living Party」同「Pair Party」3大類，所謂「定番Party」就係玩番比較傳統的Party Game，好似有擲骰仔向前行的「康樂棋」、類似大富翁的「環遊世界」遊戲、以及用Mii頭像去玩嘅「BINGO」遊戲等，當中仲會加插大量Mini Game，由一個人自己玩到最多四個人一齊玩都咁開心。

遊戲內全用上Mii人物上陣，既可以自己設計，亦有電腦提供嘅Mii角色。	激流橡皮艇，最好當然係同情人一齊玩啦。	單軌木頭車要在每個分岔口前揀左、中、前三個方向，揀錯即撞車，考彩數多過考反應。

至於好似傳炸彈畀朋友嘅「敏感炸彈」，又或者聽聲鬥快搶Wiimote等小遊戲，就屬於「Living Party」類別，好似「聽動物叫聲」遊戲，就需要先將2-4個Wiimote手掣放在枱面，然後根據唔同嘅叫聲鬥快搶對應嘅手掣，玩法新穎，其他Party Game就好少有。

「環遊世界」遊戲係要鬥快去世界10個唔同景點影張到此一遊嘅相片，隨時要成個鐘先玩得完。	「敏感炸彈」嘅玩法係要將炸彈 （Wiimote手掣）輪流交畀下一位玩家，當倒數到零時，炸彈就會爆炸，如果拎住Wiimote手震震，仲會加速倒數時間。	《Wii Party》同時推出兩款連Wiimote手掣嘅同捆套裝。每款$498

Pair Party考合拍

至於「Pair Party」顧名思義就係兩個人玩嘅遊戲，最好當然係同情人或者心儀對象拍住玩。例如識得日文嘅朋友可以玩「相性Check」，透過回答簡單問題睇吓大家夾唔夾；而「平衡船」則要玩家輪流將大細不一嘅Mii公仔放上船，兼保持船隻平衡。如果只求貪快貪過癮嘅話，可以直入Mini Game選項，揀啱Mini Game就可以玩，每個遊戲都可在一分鐘內完成，夠爽快。

Wiimote同捆套裝更抵玩

好似《Wii Party》這類Party Game當然愈多人玩愈開心，不過逐個Wiimote買真係唔太划算，所以今次《Wii Party》就出多個連Wiimote手掣嘅套裝版本，加送多一個白色或粉紅色Wiimote，價錢都只係比淨Game貴約$140，相比行貨Wiimote手掣賣$298確實抵得多。

遊戲檔案

類　　型：Party Game

開　　發：ND Cube / Nintendo

平　　台：Wii

遊戲人數：1-4人

推出日期：剛推出

售　　價：$358

查詢：2359 7998