今年3月喺靜岡模型展首度登場嘅RG高達模型，雖然比例只係1/144，但係精細度及靈活度，都拍得住大成個碼嘅MG（1/100），難怪成為高達模型（GUNPLA）30周年嘅重頭作品，睇怕10個高達迷，9個必入！呢款萬眾矚目嘅大作，日本方面早就賣行廣告，話明喺今個月24日推出，夾啱1/1大高達喺東靜岡車站展出個期，香港方面又點？據聞有機會喺7月22日就可以買到，唔止比日本早咗兩日，仲要係原裝行貨，聽講仲有贈品跟，屬實嘅話，今次代理又幾抵讚喎！