消暑大作戰，瞓住跳住玩WaterMat！

日日三十幾度，係時候展開我哋一家三口嘅消暑大作戰啦！趁住周末來臨，同埋老公、囝囝一齊去南丫島模達灣西沙水上活動中心玩水上遊戲。佢哋今年嘅新玩意，係由美國引入嘅WaterMat，浮力驚人，用聚丙烯海綿製成，而且接受過測試可以承受1,500磅重，閒閒地15個人瞓上去都唔會沉！可以叫齊班Fds喺海上開P，瞓住曬太陽、打觔斗、又跑又跳都得，仲可以玩水上摔角，鬥快推人落水……真係點玩都得！最重要係相當安全，又唔(界刂)手，囝囝點碌都得啦！

碰碰船 有大有細，大人細路都啱玩！（大船）$55（小船）$35/30分鐘	青蛙仔獨木板 囝囝都啱玩喎！$35/30分鐘	水上彈床 好彈呀！ 暫時只係畀團體使用！

此外，西沙仲有十幾款水上活動，好多款都非常合家歡，好似水上三輪車、三人獨木舟，亦有啱囝囝玩嘅碰碰船同青蛙仔獨木板；因為我哋入咗會，可以會員價每人$118任玩大部分水上活動2小時，唔講咁多，我哋一家出發消暑啦！

電動浮板 一拉着摩打，即刻一支箭咁向前衝！$55/30分鐘	水上三輪車 $55/30分鐘	開放式2+1獨木舟 啱晒我哋三口子。$125/60分鐘

西沙水上活動中心

價錢：2小時任玩套餐：$118（會員）、$130（非會員）（包免費沖身、更衣室及儲物櫃使用）

水上摔角 跑呀！ 短跑咪以為好易，試吓你就知！

爽！ 曬太陽 側身、橫瞓都仲有好多位！

地址：南丫島模達灣7號

玩完抖一抖！ 玩完水上活動，可以去附近嘅The Bay星浪餐廳Hea吓，Tea Set可以揀熱狗同漢堡包，漢堡包牛肉成寸厚，有靚海景陪襯，正！（平日）$120一個餐包一個鐘任玩其中一項水上活動，超正！

玩到攰晒仲可以喺度過夜，餐廳有房出租，基本設施齊備，仲有個靚露台，夜晚睇星星好浪漫呀！（平日）$880（假日）$980/一晚二人房（包二人晚餐一份）

查詢： 2792 8307

前往方法：於香港仔碼頭（香港仔海濱公園內「珍寶海鮮舫」接駁船碼頭隔鄰）搭前往模達灣的街渡，船程約23分鐘，平日收費$9.2，假日收費$13.8。平日每60至90分鐘一班，星期日及公眾假期每45至60分鐘一班。