「小姐，你有啲包包面喎，不如打支Botox，包瘦！」、「小姐，新出咗支美白針，打完即白！」係女仔都想上鏡時又瘦又白，但以上方法既非天然，效果又成疑，與其浪費金錢，不如用手機為相片作後期加工。新出日系水貨機DoCoMo N-04B就提供「美肌」、「瘦顏」兩大功能，變白變瘦又快又安全！

機身厚度由上代嘅22mm，瘦身到只有15.9mm，肥肉亦大幅減去12g，拎上手Slim晒！設計上，它沿用180度轉芒摺機風格，摺合時支援Multi-Touch，雙指開合就能縮放網頁、圖片。新機亦提升了快門啟動時間，由0.8秒提升至0.6秒，影相唔怕走漏Magic Moment！

Key Lock及音量鍵可當作快門及變焦鍵，不過改用左手按快門就需時習慣。	機背設有1,220萬像素鏡頭及LED補光燈，並支援ISO 12800超高感光度，幾黑影相都冇問題。	提供5個影片解像度，最高可拍攝1,280×720p高清短片。

勁過還原靚靚拳

日本女仔愛自拍，N-04B便為此加入「瘦顏」及「美肌」兩大Beauty Mode，前者提供3種不同瘦臉效果，後者則能自動修正皮膚狀態，為相中人美白、去紋兼除黑眼圈。小記立刻找來模特兒試拍，之前佢話曬過太陽兼有少許暗瘡，但經手機執過後塊面立刻變得又白又尖，最好玩係影完相後可加入心心、星星等圖案，唔使錢就有貼紙相效果！

「瘦顏」及「美肌」可合併使用，兩者都有強、中、弱3個程度，想幾白幾瘦悉隨尊便。	影完相後還可加入日期、文字及不同圖案，自製可愛貼紙相。	屏幕翻轉摺起後會變成DC形態，3.3吋芒仲支援人臉及篤芒對焦，取景一流！ $3,880

120fps極速QVGA影片

美顏模式以外，N-04B還提供多項拍攝分唇，例如28mm廣角、防手震、SCN場景及人像搜圖等等。另外，日系機打從SH-07B開始已支援1,080p全高清拍攝，雖然N-04B冇咁誇，但都可拍攝1,280×720p高清短片及每秒120格的極速QVGA影片。然而，高清短片都幾大食，拍咗10秒就用去10MB記憶體，想做大導演就要買定張microSD卡傍身了。

機面的0.8吋單色芒，可顯示時間及日期。	數字鍵稍稍凸起，手感唔錯，表面仲印有平假名字根，識日文的話可入到漢字。	放大圖片

Wi-Fi開Flash冇問題

玩得日系機都係貪佢靚樣，3.5G、Wi-Fi預咗用唔番，不過N-04B卻破格用到Wi-Fi，非但可完美顯示HTML網頁，就連on.cc嘅Flash短片都一覽無遺，唔止齋Talk咁簡單。惟要注意此機仍需Hyper SIM解鎖，收唔到3HK及PCCW訊號，而且中文輸入法亦要靠50音來輸入日文漢字，不諳日語的話就Send唔到中文短訊！

極速變靚

同時開啟兩個Beauty Mode，模特兒不但皮膚變滑變細，連臉頰都較之前瘦削，極速變靚！

極速變靚 美顏前

極速變靚 美顏後

拍片測試

短片清晰度相當高，公仔邊緣夠實淨之餘，青咇咇嘅顏色亦忠實還原。值得一提，短片格式為手機常用的3GPP，兼容性有保證。

拍片測試

上網測試

上網測試

順利開啟on.cc網頁，唔單止文字冇走位，連Flash廣告都開到。

機檔案

制式︰GSM三頻、WCDMA

內屏︰3.3吋1,670萬色TFT，480×854解像度

外置︰0.8吋單色，35×96解像度

鏡頭︰1,220萬像素CMOS

記憶體︰內置201MB、支援microSDHC記憶卡（最高16GB）

通話時間︰200分鐘（2G）、200分鐘（3G）

備用時間︰270小時（2G）、570小時（3G）

體積︰112×50×15.9mm

重量︰135g

Hyper SIM衝破機鎖

Hyper SIM是一種來自台灣的解鎖方法，它由兩部分組成，一邊是網絡商SIM卡，另一邊則是一張搭載了IC晶片的細小電路板，只要將兩者重疊再放入SIM卡槽，手機開啟時便會先讀取電路板內的資料，成功通過某些網絡測試後，便能令手機正常運作。惟注意Hyper SIM對不同手機的解鎖能力都不同，有些可用盡手機各項功能，但亦有部分只支援通話及回覆SMS，因此購買前要先問清楚。

查詢︰2374 0618