喺三年前第一集《Crackdown》內，玩家扮演未來戰警在類似《GTA》嘅開放式世界中打黑幫，坊間反應相當理想，算係打響名堂。剛推出的第二集《Crackdown 2》，當然都保留番上集充滿美式漫畫風格嘅遊戲世界，以及極高自由度嘅玩法，不過今次唔止打黑幫，仲可以喪打變晒做喪屍嘅市民，盡情開火同破壞！

可能見呢兩、三年打喪屍遊戲都幾受歡迎，所以今集直情話太平洋城受到病毒入侵，令到好多市民變成喪屍，不過造型就唔算核突，亦冇《Left 4 Dead》中嘅喪屍咁變態，但勝在玩家可以選擇拳打腳踢、開槍甚至開車撞瓜佢哋。

隨街開拖打人

遊戲嘅自由度好高，可以逐個逐個任務咁完成之外，亦可以隨街向黑幫同喪屍開拖，或者搶架戰車兜風都得，想點就點。雖然話玩《Crackdown 2》呢類遊戲都係喪打發洩多於一切，但如果了解多啲任務性質同故事發展，點都會玩得投入啲，所以今集在提供英文語音外，仲加入中文字幕，唔怕睇唔明。同時，今集的畫面處理比上集更成熟，流暢度同爆破場面都做得更有水準，而且由於主角身為未來戰警，少不了誇張嘅動作，例如可以跳上幾層樓咁高，亦能夠雙手捧起戰車掟向敵人，玩法都幾瘋狂。

提升5大超能力

《Crackdown 2》保留咗包括跳躍、射擊、體力、爆破同駕駛等5種能力值，玩家可在遊戲過程中搵辦法升級，好似要獲得更高嘅跳躍能力，就要諗辦法在高樓大廈嘅屋頂拎走個發光球，咁樣升級後就可以跳得更高，兼且從高處跌下時都唔會扣太多能源；而升級射擊能力值後就會提升開槍嘅準繩度同殺傷力；升級體力就可在近距離的攻擊中獲得優勢，而且仲可以舉起超重物件進行攻擊；如果想增加爆炸範圍同殺傷力，就要提升爆破能力值；但駕駛能力嘅升級方法就最特別，除咗要取得升級光球外，仲可以係靠揸車時撞死敵人來升呢，之後就能駕駛更強嘅戰車，隨街橫衝直撞。

四人連線互片

另外遊戲嘅多人連線模式亦做得更完善，可以支援到16人連線對戰，等玩家在太平洋城內玩Death Match多人互片。唔想互相開火的話，亦可透過Xbox Live連線玩新加入嘅四人合作模式，玩法同單機模式一樣，但正所謂「人多好辦事」，就算有再多喪屍都唔使怕。

前《GTA》製作人開發 網站評分高

第一集《Crackdown》在07年2月推出，同樣以太平洋城為背景，玩家要在自由度高的遊戲世界內剿滅黑幫，支援雙人Xbox Live連線合作，截至07年底全球賣出逾150萬套。《Crackdown》是由曾開發《GTA》的遊戲製作人Dave Jones自立門戶（Realtime Worlds）後的作品，難怪有人會覺得設計跟《GTA》相似；此外遊戲在外地遊戲網站評分相當正面，如Eurogamer評為9.0/10分，GamePro則為4.5/5.0分，而IGN亦打出8.0/10分的成績。

查詢：2725 3338