04/07/2010

播放本新聞相關短片

首隻中文版《孖寶兄弟》Mario之父教匿泡過關

雖然昨日才正式推出《New Super Mario Bros. Wii》繁體中文版,比起日文版遲了足足7個月先面世,不過都有唔少「驚喜設計」,例如食咗螺旋槳蘑菇再揮動Wiimote可以向上飛;用Wiimote行上升降機之類,不過講到最爆,就一定係「Mario之父」宮本茂以神秘嘉賓身份現身香港發布會,仲即場露兩手!

到底《New Super Mario Bros. Wii》有幾受歡迎?除咗得到日本遊戲雜誌《Fami通》的40分滿分評價外,銷量數字更打破Wii遊戲嘅紀錄,日本首周就賣出逾93萬隻,用咗7個星期就達到300萬隻嘅銷售數字,而截至今年3月底全球更賣出逾1,470萬隻之多,真係威到盡。

體感操作 創意十足

相信大家都應該有玩過《Super Mario Bros.》,要在原有橫向「頂龜」玩法上再加入新意並唔容易,今集其中一個特點就係可以用上Wiimote的體感功能,如食咗螺旋槳蘑菇飛天時,就要搖動Wiimote手掣;遇到場景上需要轉動螺絲或升降台時,都係靠晒Wiimote操作,可謂創意十足。

四人模式 合力過關

正如宮本老師在發布會上所講,設計遊戲嘅宗旨係就算大家Level唔同,一齊玩時都可以享受得到遊戲過程,以及互相溝通時嘅樂趣,所以在今集新增嘅4人模式中,就加入唔少需要互相幫助嘅玩法。例如Mario可以舉起Luigi,令佢可以高角度掟冰球;又或者可以踩在同伴的頭上頂爛更高嘅磚塊;亦能順便讓食了螺旋槳蘑菇嘅同伴送你一程。

冰涷對手 掟走過癮

正如上文提過嘅螺旋槳Mario同舊作已有嘅火燄Mario、超小Mario外,今集亦加入造型好Cute嘅企鵝Mario同冰凍Mario,前者可以在水中或冰上自由行動,而後者可以先冰凍對手然後掟走,玩落真係好過癮!若然各位無太大信心,製作人宮本老師就教路話大家可以匿入泡泡,輕輕鬆鬆由同伴帶你過關,果然夠晒合家歡。

遊戲檔案

類型:動作

開發:Nintendo

平台:Wii

日期:已推出

售價:$399

查詢:http://www.nintendo.com.hk/

《Super Mario Galaxy 2》中文化進行中

宮本老師在記者會上仲自爆剛於日本上市嘅《Super Mario Galaxy 2》都進行緊中文化,遊戲繼承兩年半前第一集嘅3D玩法,控制Mario騎住Yoshi穿越各行星版圖進行大冒險。宮本老師同香港任天堂都冇講到幾時先會推出中文版,但以《New Super Mario Bros. Wii》中文版比日文版遲7個月計,應該可趕及年底前推出!

新色Wiimote登場

趁住新遊戲可以玩4P,香港任天堂都順道推出幾款新色Wiimote手掣,率先登場的有彩藍及桃紅兩色,即日已經有得賣,至於個人覺得最靚嘅黑色版本就要延遲到7月31日才開賣。

神級製作人多名作

各位機迷都聽過宮本茂(Miyamoto Shigeru)嘅大名,1977年開始於任天堂任職,至今擔當任天堂情報開發本部長及專務董事,在剛過去的E3遊戲展中還上台示範玩《薩爾達傳說:天空之劍》。宮本老師除了是「Mario之父」外,膾炙人口嘅《Donkey Kong》系列、《薩爾達傳說》系列、《Wii Sports》系列等都係全由佢設計及監製。

Brian