唔通捱夜睇波眼花花，點解壽司會變成波形？閣下大可放心，其實這是灣仔新日本料理Bubbles Sushi的招牌菜，每球壽司飯面都鋪上新鮮刺身，五顏六色，一如頂級足球盛事的各支勁旅。面對如此美味的「對手」，司職右後衞的有線主播陸浩明（6 Ho）奮勇狂食，仲話會大炒10「球」！

鍾意踢波的6 Ho，每星期起碼落場兩次，近來更加係全情投入，為做好講波「午夜場」節目，場場球賽都瞓身支持。談到今屆賽果，狂熱球迷就話：「好多場都令人跌眼鏡，估唔到德國、西班牙都會輸畀弱隊，而且普遍入球偏少，唔算精彩。我睇好阿根廷同巴西，覺得兩隊仲未發揮到極限。」

6 Ho近況 有份主持「有線高清世界盃午夜場」，每晚同嘉賓傾偈、播放賽事精華片段等，為做功課場場波都要睇。自言因從小喜歡橙色而成為荷蘭隊擁躉，大讚全攻型踢法最好睇。

看6 Ho一球壽司入口，非常容易，難怪可閒閒地數10球！

一「球」入口　味道豐富

相比起反常的賽果，餐廳Bubbles Sushi就正路得多，菜式質素不俗，招牌菜Bubbles Sushi絕非球賽的副產品，而是因為餐廳所屬公司得名。Bubbles Sushi球球足料，先是壽司飯混合了大葉碎、薑、香草及芝麻等，比平日的壽司更有豐富口感及味道，搓成圓球狀玩味十足，而面層則鋪上新鮮刺身，像帶子、黑目鯛、海膽、三文魚等，色彩繽紛，睇見就開胃。

餐廳的一隅為壽司吧，刺身櫃內放滿時令精選，種類繁多，以LED燈裝飾更奪目更Fresh。

有別於傳統的日本餐廳，Bubbles Sushi有型格的鋁管燈、玻璃Feature Wall，配以高高的卡座，感覺很時尚。

甫開餐，6 Ho即來一輪快攻，搶食美味的波波壽司：「我好鍾意食日本菜，每個月平均食一至兩次，首選刺身，因為夠鮮味。咪睇呢度啲壽司波細細粒，其實質感實淨，而且味道豐富，閒閒地食十球八球啦！」見佢食得乾脆利落，轉眼已經掃走12球，比預期的10球更多，仲要求半場休息，回一回氣再擦餐勁！

葡萄蝦　$90/隻 夏季當造的海鮮，紫色的外殼甚為吸引，肉質爽甜鮮味，還有幾顆如葡萄的蝦籽，可嘗到牠的不同風味。	和牛他他燒　$120 以鹿兒島A4和牛入饌，但選上油花較少的膝部，愛其牛味濃郁有嚼勁，薄薄的一片捲以大葱絲及青瓜絲，可平衡味道。	香魚鹽燒　$120 此魚多肉又嫩滑，還帶有特別果香，燒至9成熟最好，蘸點以Ta De葉炮製的酸汁，更清新美味。

時令刺身　一目了然

下半場一開始，6 Ho即轉攻刺身，壽司吧位置備有一列刺身櫃，還裝上LED燈，想知是日精選，可謂一目了然，特別推介坊間少見、紫色的葡萄蝦，肉質爽甜，還綴以幾顆像葡萄的蝦籽；鰻魚苗則條條不足一個月大，但已變成桌上佳餚，入口滑潺潺，甚有魚味，配合淡淡的酸汁，非常開胃。入行多年的師傅表示：「呢期梗要食白身魚刺身啦，好似鰹魚、石頭魚等。油分多的、濃味的刺身通常會留待冬天品嘗。」

櫻花蝦餅　$78 內有櫻花蝦、三葉、南瓜條及番薯條等，炸得鬆脆，焦點在奉上的蝦鹽，蘸少少即起提鮮作用。	鰻魚苗　$89 這種海鰻的小BB，薄身又滑嘟嘟，師傅特地將之配合雞冠草及淡淡的酸汁，一箸夾起品嘗好暢快。	波子乳酸　$32 天氣炎熱想開開胃，不妨柯打這款混合乳酸及波子汽水的飲品，酸甜得來頗清新，杯底放有作點綴的玻璃珠，甚具玩味。

輪到餐廳另一主打─關西料理，師傅說：「關西菜較為傳統，當地天氣凍，大家會偏愛食濃味菜式，像以醬汁醃味、鹽燒魚等，還會按時令品嘗，不時不食。」眼見6 Ho夾齊香魚鹽燒、櫻花蝦餅及和牛他他燒等，就知好味道，他說：「食嘢好開心，係一種減壓方法，幾鍾意食鰻魚苗，質感得意，又有酸汁做湯底，好好味，和牛他他燒有青瓜及大葱絲伴食，味道幾平衡，唔……菜式水準都幾平均。」聽6 Ho咁講，呢餐當然是食到飽飽完場。

查詢：3746 9999

食雞會快樂

世界衞生組織（WHO）曾分別對水果、蔬菜、肉類等作出研究和評選，列出全球最佳食品排行榜，當中最佳水果有9種，並以木瓜為首；而最佳蔬菜有13種，紅薯既含豐富維他命，同時有優良的抗癌功效，故為所有蔬菜之冠；最佳肉食則是雞、鴨、鵝，其中鴨及鵝肉的化學結構最接近橄欖油，有益於心臟，雞肉就被評為「蛋白質的最佳來源」。加上雞肉含豐富的硒，曾有位心理學家研究發現，吃雞肉可令人精神好，思維更為清晰，所以常吃雞肉，心情更開朗。另外雞湯更被選為最佳湯水，尤其是母雞湯，具有防治感冒、支氣管炎的作用。