機王iPhone 4於上周四（6月24日）正式起錨，美、英、法、日多國率先推售，有日本學生不惜排隊兩天為奪心頭好，不過總好過香港機迷乾等仲要捱貴貨。事關頭批水貨貨源緊絀，未解鎖黑機炒到過萬元，解鎖版更要$15,800先有交易，雖然咁貴都一樣見一部搶購一部！今次iPhone 4創先河唔係美國地區獨家發售，英、法、日都在同日派貨，但由於匯率及消費力不同，各國嘅銷售策略都唔一樣，例如美版及日版要分別跟AT&T及Softbank綑綁式出機，只有法國及英國才有淨機賣，法國開價最高，16GB及32GB各賣629歐元（約HK$6,100）及739歐元（約HK$7,200），但香港水貨仲貴。

英國版冇SIM Lock

每次Apple有新嘢出都會率先入貨嘅G-World，負責人Lo哥早前曾預計首日可從日本返到50部iPhone 4，不過由於當地放機人數遠比預期少，以致到港首天（6月25日）只返到3部美版機，兩部32GB版本仲迅速賣出。售價方面，至截稿前為止，16GB賣$9,800，32GB則賣$11,800，不過暫時只賣給首50名預訂客人。至於先達另一店舖數碼動力則有英國版賣，由於冇SIM Lock，因此16GB炒上$12,880，32GB更炒至$15,800，同樣被搶購一空，但負責人指今、明兩日會再有少量返貨，有心人不妨碰碰運氣。

放大圖片	有部分店舖就高價收機，不過未拆盒黑機都只收$7,000，試問點會有人放？	將新舊兩部iPhone拍埋，iPhone 4（左）個屏幕明顯更清更光，Icon邊線亦更實淨，靚！

高清屏幕無手指模印

講番部機本身，今次小記試玩的為有鎖的美版iPhone 4，一如過往需要Activation才能啟用，雖然大部分功能都用到，但由於設有SIM Lock，因此全港各台的Micro-SIM卡都未能成功辨認，不過有傳外國黑客已成功破解iOS4，所以解鎖只是時間問題。屏幕方面，在Retina Display技術幫助下真係好靚，解像度有成960×640，拍埋iPhone 3GS一比，會發覺桌面圖示啲Icon仔都變得更清更實淨，而且推至最光的話，亦比舊版光亮得多。最重要是表面有防污處理，即使拍攝時左翻右翻都未有印上手指模，抵讚！

SIM卡槽改在機側，並倣效iPad改用Micro-SIM。	包裝盒上的iPhone 4用45度影埋去，更有Feel！跟機送USB線、耳機及兩腳火牛。	新iOS 4支援Multi-tasking，連按兩下Home掣便能切換背景程式。

實測拍高清甚流暢

iPhone 4厚度僅9.3mm，號稱係全球最薄Smartphone，實物所見的確好Slim，起碼比iPhone 3GS薄三分之一，只是拿上手後，其平面方角造型卻沒有弧形機背嘅第3代咁好手感。至於今代大躍進嘅500萬像素鏡頭，拍攝介面可開啟新追加的閃光燈，並可拍攝GeoTagging相片。小記實測其720p高清拍片功能，發覺攝錄及存取均非常流暢，拍完又可逐格菲林重播，遺憾是iMovie App仲未有得賣，暫未能測試其剪片功能。另外，iOS4大部分功能如多工作業、開Folder都用到，但遺憾現場只有一部測試機，玩唔到FaceTime視像通話。

試拍720p高清片，無論拍攝或儲存都好快，重播時又可逐格菲林回帶。拍攝時特別用手指Focus招牌，即可做出前清後矇的淺景深效果。

終於可拍攝Geo-Tagging相片，經Google Maps就能找回拍攝位置。

3GS回收價再跌一成

T-Mobile店員德哥指iPhone 4一出，舊機回收即時再跌一成，16GB 3GS目前只收$3,000左右；32GB則有$3,300，舊用戶放機要快手了！

G-World負責人Lo哥表示日內會返多10多部黑機，但由於行貨未定出機日期，因此炒價短時間內都不會回落。	德哥	先達店員 Kiko 睇見iPhone 4實物後，反而冇想像中咁靚，而且又起晒角，手感都幾差，等佢跌價先再考慮。
Model Sarena Li 我最鍾意佢多咗前置鏡頭，方便平時自拍。但係過萬蚊真係太貴，$8,000內我先會考慮！	放大圖片