幾乎每次經過上水，都是為了要到羅湖北上玩樂，原來上水有節目更勝於羅湖，若閣下志在回歸大自然，回味Old School玩意，上水其實好多嘢玩。

上水假日農場除有農場必備的小動物及新鮮瓜果外，又有一系列懷舊玩意，如人力車、踩水車及「阿拉飛氈」，刺激快感原來唔使靠機動遊戲，坐麻包袋當飛氈一樣High！

阿拉飛氈 叫足五秒

成立約十年的假日農場，唔止農場咁簡單，進園不久已有兩條滑梯，讓你感受離心力醒醒神！初時看見這條大滑梯，並沒有聯想起恐懼與刺激感，當陽光男孩Travis拿起麻包袋，率先試玩，然後五秒間從上面尖叫滑下，大家才對這條名為「阿拉飛氈」的玩意刮目相看。文靜女模Pinky見Travis玩得過癮，竟衝破恐懼試玩，最後驚青至全程閉眼瞓直滑下，似乎刺激度更勝當年水上樂園的超斜滑梯。

玩完飛氈壯了膽，二人全程投入試玩園內全靠人力推動的刺激活動，包括坐定定有得玩的飛天索「小吊籃」、突然升高升低的「震盪高搖板」及跑草馬，似乎這兩位八十後都頗喜歡這些Old School玩意。

即摘荔枝 荷花獵影

農場面積廣闊，空氣清新，自然種植了不少瓜果。除了現時當造的「糯米糍」荔枝及茄子外，還有黃皮、青提子、木瓜、葫蘆瓜、熱情果及市面少見的蛇瓜。Pinky見蛇瓜似蛇又似劍，即時高舉當木棍亂打Travis，嚇得這位大男孩跑入綠色迷宮暫避風頭！迷宮附近種滿食桌常見的植物及香草，如崩大碗、百里香及蘆薈等，叫人增進不少草本知識。此外，荷花池正值初夏荷花綻放，至啱龍友獵影。

餵飼動物 大玩拔河

新界牛隻買少見少，城市的孩子更可能從未見過牛牛真身，Travis與Pinky得悉可以餵牛牛，立即執起鮮草，親手餵飼平時只作觀賞、而不用下田幹活的幸福牛女。從未親手餵過牛的Pinky愈餵愈興奮，好抵得諗嘅Travis更拉動人力車，拉住Pinky邊坐邊餵。

二人餵完牛牛，又吵醒正在午睡的大肥豬，然後又買了些紅蘿蔔條餵葵鼠及兔仔。負責人提醒我們要同小動物玩「拔河」先過癮，Travis與Pinky於是緊握紅蘿蔔條慢慢餵飼，與小動物進行拉鋸戰，眼見二人咬牙切齒與兔仔鬥牙力，令人忍俊不禁。

提早預訂 焗靚麵包

時下農場都興玩DIY手作仔，假日農場都不例外，除有拉麵及竹昇麵DIY外，訪客還可以焗麵包。只要到訪前預訂，農場便會預備好發酵麵糰，屆時便可隨心所欲創作一番。將麵糰放進焗爐十多分鐘後，一個形狀獨一無二的麵包便新鮮出爐！

假日農場

地　　址：上水大隴坑村62號C

電　　話：2670 2345

收　　費：$50、麵條DIY：$20、麵包DIY：$10

前往方法：上水火車站坐的士約$30；上水火車站轉乘58K小巴至丙崗村再步行約15分鐘。