父親節適逢世盃，叻生晚晚捱夜，加上英格蘭同德國嘅「出色」表現，為咗令皇上息怒，叻仔學沖花茶！

雖然今日先係父親節，之不過囝囝兩個星期前已經問我買咩禮物畀爹哋好？原先諗住叫囝囝畫幅全家福，之但係又好似好行貨咁，左諗右度之下，眼見叻生近排晚晚投入睇波熱潮而捱到金睛火眼，所以早早教定囝囝沖花茶，今朝一早沖畀叻家嘅皇上飲，紓解疲勞，之後再加一句Happy Father's Day！嘩，叻生肯定甜入心囉！

玫瑰花大棗茶 撲滅肝火

材料：玫瑰花一錢、大棗三枚

沖製方法：材料放入杯中，注入沸水沖洗一遍，再加入沸水焗約15分鐘，去渣後即可飲用。

功效：玫瑰花味甘、微苦，性溫，可行氣解鬱、和血散瘀、活血止痛。大棗可健脾益氣、養血安神。適用於捱夜所致嘅肝火旺盛、急躁易怒、肝胃氣痛、精神疲勞。

飲用次數：每周可飲用一至兩次。

注意：孕婦禁用。

菊花花茶 紓緩雙眼

材料：白菊花五錢

沖製方法：將材料放入杯中，注入沸水沖洗一遍，再加入沸水焗約15分鐘，去渣後即可飲用。

功效：有疏散風熱，平肝明目，清熱解毒之效。對於通宵捱夜所致嘅頭痛、眩暈、目赤腫痛，口乾口苦者最啱，尤適用於經常使用電腦或長時間眼部用神所致嘅眼睛疲勞。

飲用次數：每周一至兩次。

注意：不適用於陽虛體質者。

隔夜花茶唔好飲

郭令兒中醫師表示大多數花茶都有理氣、疏肝、開胃作用，但唔同嘅花茶功效各異，因此大家响挑選花茶時，一定要先了解其功效。此外，花茶宜响沖泡當日飲用，唔適宜隔夜飲，加上其性較涼，亦唔適宜空腹飲用。

郭令兒中醫師指出，各式花茶擁有唔同嘅療效，宜先了解其功效才飲用。

同爸爸去邊玩?

如果你打算簡簡單單應吓節，我特別精選咗一啲活動，睇吓啱唔啱Feel ?

古今變幻球

全城足球熱，商場專程由蹴鞠發源地山東省淄博市，邀請兩位著名蹴鞠好手來港，並穿上仿唐宋時期嘅蹴鞠服飾，重演蹴鞠比賽場面。眾表演者仲會即場傳授在場父子古今足球技巧，開波啦！

時間：1:00pm

地點：鑽石山荷里活廣場1樓明星廣場

查詢：2118 8811

大玩新科技

大部分爸爸都係「機民」，視聽展網羅咗世界級影音器材品牌，並响場內劃分「試聽區」及「試玩區」，為每個音響品牌設獨立房間，可以响房內試聽最新Hi-Fi，現場更設有PS 3及X Box試玩添！

「數碼港高級視聽展2010」

時間：12:00nn至7:00pm

地點：數碼港商場全天候廣場及數碼港3座3樓

查詢：3166 3111

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝