今年E3焦點所在當然是Xbox 360 Kinect，完全唔使用手掣打機，改變遊戲機嘅固有玩法。Kinect將於11月4日率先在美國推出，其中6款對應Kinect的遊戲，除已在Xbox 360展區有得試玩外，Microsoft在開騷前一晚已預早為傳媒舉辦試玩會，小記玩過後只能用兩個字形容：「正」同「攰」！

由於Kinect遊戲全部唔需要控制器就可玩，所以經過工作人員簡單講解後，好快就可以投入，而且玩法都不外乎郁手郁腳同跳動，對於平常少做運動的朋友嚟講，玩落都幾吃力。

15套遊戲跟機推出

Microsoft在美國時間14日早上E3發布會上推介的6款Kinect遊戲，當晚悉數在傳媒試玩會上現身，包括4款由Microsoft Game Stuidos發行的遊戲，以及第三廠商的跳舞遊戲《Dance Central》和健身遊戲《Your Shape：Fitness Evolved》，玩法各有不同，但全部一玩就上癮。據官方公布，當Kinect在11月正式面世時，將會有15款支援遊戲同期推出，而且仲露咗口風話《Star Wars》同《Forza 4》，都會在2011年推出Kinect版本，真係好令人期待！

放大圖片	放大圖片	放大圖片

試玩報告

無軚駕駛《Kinect Joy Ride》 簡單易玩的賽車遊戲，唔需要理會踩油門及煞車動作，利用氮氣加速時只要將雙手拉到胸前再猛力推出即可。 好玩度：5星 疲倦度：3星半	勁歌熱舞《Dance Central》 可以跟住畫面上的指示跳舞，而且背景音樂都幾正，連Lady Gaga都有，又係另一套唔玩唔得的Kinect遊戲。 好玩度：4星半 疲倦度：5星	勁考體力《Kinect Sports》 項目範疇都幾闊，連少有嘅足球同沙灘排球都有；不過最考體力嘅係田徑比賽，如玩跨欄時，要原地跑同原地跳，難度幾高！ 好玩度：5星 疲倦度：5星
寵物育成《Kinectimals》 寵物育成遊戲，但就換上造型可愛的老虎仔和獅子仔等，可以對住鏡頭同佢玩，雖然唔多使郁動，但就成功吸引到唔少女行家試玩。 好玩度：4星 疲倦度：2星	激過《Resort》《Kinect Adventures》 玩法似《Wii Sports Resort》，不過就激得多，需要全身郁動先能夠過關，更要不時跳躍同踎低，但攰得嚟都好好玩。 好玩度：5星 疲倦度：4星半	健美修身《Your Shape：Fitness Evolved》 玩法相對地比較靜態，但遊戲可以感應到玩家身體每個關節的動作，唔怕做錯鍛煉引致損傷。 好玩度：4星 疲倦度：3星半

Kinect新作預告

《Star Wars》 最正係可以拎住光劍攻擊，遊戲示範片段仲加入同黑武士對決嘅一幕。

《Forza 4》 暫時公布嘅資料唔多，只見到可以直接用手「觸摸」靚車及內部零件。

新Xbox 360 全面升呢

新版Xbox 360除比以往細同輕外，設計都略有不同，如機身中間加入斜面設計，光碟盤採用感應式開關，機背新增Kinect專用連接端子，方便接駁Kinect模組，硬碟容量和Wi-Fi制式亦分別升級至250GB和802.11n。美國方面已經即日發售，至於日本亦都會在本月24日推出，香港市場就要再等消息啦！

新Xbox 360採用感應式碟盤開關設計。售價：299美元、29,800日圓	內置硬碟收藏在機底位置，使用的2.5吋硬碟亦屬特別設計。	位於LAN插位上方的Kinect Aux端子，用以接駁Kinect模組。