潮流興團購，安坐家中就可享唔同網站搜羅嘅獨家優惠，衣食住行樣樣齊，年中真係慳唔少！

叻太平時最鍾意同班潮媽出街搵着數，一聽到買二送一、三人行半價等優惠就雙眼發光，齊Join齊慳錢！不過我發現，只要Join依家大熱嘅「團購網」，就唔使出街都大把着數！呢種「快閃團購」網上消費模式响美國非常流行，旨在透過社交網絡連繫各路買家，增加議價能力，提供宣傳效用，令賣家願意提供超筍優惠。今次我就向大家推介最新面世嘅「夠買網」和團購網始祖「激安Zone」，各位阿太留意啦！

夠買網最新夠潮

「夠買網」由幾位專長e-marketing嘅年輕人阿倫、Gary及Allen負責，網站上周五先正式發布，可謂新鮮滾熱辣！網站主打夠快夠專業，既有專業客戶服務團隊專責回應、解決客戶疑難，亦有Sales Team為網民搜羅城中至抵優惠，透過facebook、Twitter及電郵等渠道招徠，而且號稱「不成功不收費」添！

激安Zone團購始祖

早响一月已開始於facebook發起團購服務，五月中成立網站，可謂團購始祖。網站主打多元化特色優惠，由於款式多且價錢大眾化，現今facebook已有20,000會員之多！有興趣購買優惠嘅買家，只需响網站登記，並以PayPal或信用卡付款，集合足夠買家就等待網站發放電子購買券。手持列印嘅電子購買券，網民便可到商戶享受獨家優惠。每張電子購買券都印上姓名、認證碼等資料，防止轉讓或販售。

平買貴價精品

要為家居注入高貴品味？係時候啦！我八到專賣高級家品擺設嘅集雅廊，破天荒由即日至6月20日响中環旗艦店做大減價，好多高級陶瓷、銀器、餐酒開瓶器及多個歐洲品牌如Bernardaud、 Goebel、Peugeot等精品首飾，全部以低到二至七折發售！以咁優惠價錢就可以買到優質嘅高貴家品，面對咁多筍貨，我叻太惟有暫時放低高貴形象，殺落舖掃貨先得！

查詢︰2521 8626

不含DEET防蚊產品

家有豆丁，外出一定要有驅蚊產品傍身，不過市面上大部分驅蚊產品均含有化學成分DEET（避蚊胺），早前有報道指出，DEET有可能釀成胚胎發育唔健全，尤其對小朋友同孕婦影響最大。响我發揮購物小宇宙後，終於搵到不含DEET及毒性嘅珮氏驅蚊爽系列，包括防蚊貼以及噴霧、走珠裝等。產品成分蘊含歐洲天然野紅茄提取物，據美國北卡羅來納大學研究發現，野生蕃茄中含有一種名為「IBI-246」嘅物質，其驅蚊功效較DEET及香茅油更安全有效，咁就用得安心囉！

查詢：3526 6666　網址：www.lux-pearls.com

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝