手機近年來朝着兩極發展，一係愈出愈細，一係屏幕愈大愈靚。小記大男人一個，手機太細當然唔慣，所以揀手機都以靚芒行先。Samsung就深明此理，繼首創AMOLED屏幕後，日前再把屏幕升呢，為新機Wave加載Super AMOLED絕色靚芒，用嚟玩內置嘅體感賽車Game逼真到爆！

那邊廂有傳iPhone 4G堅持使用LCD屏幕，這邊廂Samsung手機屏幕卻愈出愈靚。早於去年4月，Samsung已推出全球首部配備AMOLED屏幕嘅S8300H，後來跟風之作不絕，正當其他廠仍在向它採購AMOLED時，Samsung卻再推Super AMOLED，擺明肥水不流別人田！

其實iPhone 3G個芒（左）都唔差，但拍埋Wave（右）身邊一比，就會見到後者飽和同亮麗好多，就算校到最光都唔刺眼。

機背是防花金屬面，右上角則設有500萬像素鏡頭連LED燈，典型Anycall手機格局。

反光度相當低

舊式AMOLED面板由玻璃、觸屏及LED三層物料集合而成，優點是反應快、對比高、又省電，今次Samsung Wave改用Super AMOLED屏幕，雖然只有3.3吋，但由於集成層數的內部空間減低了，因此面板更薄之餘，觸控反應亦更加靈敏，同時色域及對比度都得到提升。將Wave拍埋iPhone 3G一比，就會發現前者畫面亮麗得多，最抵讚係陽光直射下都保持清晰，證明反光度極低，以後出街煲劇就唔使匿埋一邊。

要拆電先換到記憶卡，勁唔方便，係設計上唯一敗筆。	提供3.5mm耳筒插口及microUSB介面，而它更是全球首部藍芽v3.0手機，過相過歌更快捷。	Super AMOLED面板可以造得更薄，因此機身厚度只有10.9mm，好多直身機都自愧不如。

自家網店面世

除咗屏幕升呢，Wave更首度採用bada作業平台，由Samsung自家研發，韓文解作「海洋」，顧名思義就係想令到手機內容好似汪洋咁廣闊。要做到呢點，每部bada機都會內置Samsung Apps網上商店，容許用戶下載新聞、交友及遊戲等各類程式。

內置Social Hub網絡中心，可綜合處理10組電郵及Facebook、Twitter等社交網訊息。	Wave亦強化了聯絡人頁面，能直駁Facebook把相片及活動紀錄下載落嚟，毋須另開網頁咁麻煩。	由6月下旬起，Samsung Apps便會提供多個免費本地App，《電影速遞》是其中之一。

官方透露目前共有60個付費及40個免費App，到6月下旬，還會追加《六合彩》、《電影速遞》及《衝廁》等免費本地App。雖然數量冇得同App Store鬥，但實測所見，介面及信用卡付款機制都好成熟，相信不難吸引程式設計員參與開發。

TOUCHWiZ v3.0介面共提供10個分頁，部分Widget更支援多工作業，例如時鐘就能同時作股票報價。	Wave仲係首部無線N制式手機，可把頻寬經IEEE 802.11n分享畀電腦用，好鬼先進！	長按「Home」掣就會彈出Multi-tasking頁面，可獨立關閉程式，騰出資源。

支援多工作業

手機多咗嘢玩，仲係牛龜咁慢當然唔得，所以Wave內置咗Cortex A8 1GHz處理器，並支援Multi-tasking，只要長按「Home」掣，便能把背景程式逐一關閉。另外，沿用已久的TOUCHWiZ介面亦由2.0升級至3.0，可用頁數激增至10頁，而且今次Widget比以往更「多工」，例如時鐘除了報時外，還能一直更新股票價格，一物兩用！

至於多媒體方面，支援DivX、Xvid及MP4唔算出奇，最正係可以睇埋720p短片及5.1聲道音效，衰在唔兼容RMVB格式，否則屋企個部PMP都可以擺埋一邊！

機檔案

制　　式︰GSM 四頻、UMTS

操作系統︰Samsung bada

屏　　幕︰3.3吋1,670萬色Super AMOLED（480×800解像度）

鏡　　頭︰500萬像素自動對焦

記　憶　體︰ 內置2GB、支援microSDHC記憶卡（最高32GB）

對外連接︰ 藍芽3.0、USB 2.0、3.6Mbps HSDPA、IEEE 802.11n

通話時間︰15小時（2G）、6.5小時（3G）

備用時間︰550小時（2G）、510小時（3G）

體　　積︰118×56×10.9mm

重　　量︰118g

查　　詢︰3698 4698