小記一廂情願以為，帶藝人黃長興去新開的PappaMia Coffee Restaurant，由法國型男試食怡保河粉、拉茶、咖啡包等，會好有新鮮感。結果？長興說：「爸爸好鍾意用咖央搽麵包食，我都算由細食到大o架！」又跟小記講起去印尼探親、滯留新加坡的瑣事，認真估佢唔到。所以，拉茶亦要像紅酒般慢慢品嘗，又有何不可？

叻沙、半熟蛋、咖央及海南雞等東南亞美食，近年慢慢融入大家生活之中，若嫌食過的不夠正宗，不妨來這間「原籍」馬來西亞的PappaMia Coffee Restaurant。此「過江龍」在世界各地的分店多到數不清，只知遍布大馬、新加坡、韓國、中國、杜拜及日本等地，而香港的首間分店，則選址在尖沙咀一間樓上舖，佔地近六千平方呎。

黃長興近況 正拍攝新劇《怒火街頭》，有份演出的劇集《談情說案》、《公主駕到》將陸續登場。

餐廳地方寬敞，用木材作裝飾兼掛上富當地風情的畫作，環境不俗。另有間千多平方呎的貴賓房供包場開派對。

鬆化「漏油」咖啡包

據說大老闆David對食材要求嚴謹，更要求所有分店的出品味道一致，香港店內的咖央、咖喱、怡保河粉、各類醬汁、冰咖啡等，都從總公司運來。數到「Must Eat Item」，長興即大讚手上的香啡（Pappa Bun）：「咖啡味香濃，咬落脆口鬆化，裏面仲有鮮牛油添，兩種味道好Match。」別小覷這種「咖啡包」，早已紅遍東南亞，PappaMia的出品亦大受歡迎，香港用的麵糰、咖啡漿都是由總公司供應，還有當地過來的師傅指導炮製，務求做到原汁原味。

帕帕炒粿條 $62 粿條（厚身的怡保河粉）是焦點所在，入口滑溜溜，但當中的醬汁更為精彩，甜甜的質地濃稠，令每條粿條都沾得上，配鮮獅蚶、鮮蝦及蛋絲等，非常出色。	怡保鮮蝦雞絲河粉 $58 河粉滑溜又煙韌，有湯煮、炒及乾撈等食法，個人最喜歡這款清甜湯河，食完就會明白甚麼叫滑不溜口。	炭燒麵包（兩片）$23 從南洋來的麵包經烘焗後，咬落外脆內軟，比只得香脆口感的多士更豐富，配以地道咖央，甜膩而香濃。

另外，拉茶亦是店內必試之選，用的是斯里蘭卡茶葉，沖出來卻沒有澀味，而且香滑順喉。為幫小記影張靚相，師傅不厭其煩將茶拉完再拉，長興每次都看得入神：「味道好好，面層的泡泡好得意，襯埋咖央包食就最Perfect。」原來長興的爸爸在印尼長大，習慣朝朝食咖央包做早餐：「我哋食開那種罐頭咖央，超市有得賣呀！不過顏色就偏橙色，呢度用嘅淺色啲，味道甜甜地又濃郁，見到就好有親切感。」

南洋拉茶（冷）$18 選用斯里蘭卡茶葉沖製，師傅謂先要放糖，再以密度高的茶袋反覆拉茶三次，才會又滑又香，唱時厚厚的茶泡沾滿嘴最過癮。

香啡 $8/個 必試美食，每次出爐即被掃清，咖啡味道配以中間像流沙般的牛油餡，好食得忘了自己在減肥。

滑一滑怡保河粉

別看長興像半個外國人，便以為他一面倒只食西餐，他為自己平反：「爸爸偏愛中菜，細佬鍾意西餐，我就兩樣都食。」他表示法國有好多東南亞人，開設的餐館非常地道，他最愛食那些粉麵，加上有不少親戚居於印尼、新加坡的緣故，因而經常去東南亞旅行，試過不少地道菜，首選肉骨茶及海南雞飯。

而這裏眾多美食中，小記特別推介怡保河粉，全由馬來西亞運來，由於那邊有好山好水，造就河粉特別薄身，質感煙韌得來滑溜溜。煮法則包括放湯、炒及乾撈等，非常百變。而厚身的河粉即粿條，亦如當地出品般炒得微焦，至於那作靈魂的醬汁更是David千辛萬苦得來，自從在怡保試過一位出名炒粿條的老人出品後，David便對那醬汁念念不忘，幾經辛苦才用誠意打動對方，將醬汁秘方賣給餐廳，炒出惹味炒粿條，並成為招牌菜之一。

查詢：2366 4066