以前篤芒拍攝是手機和DC仔的專利，直至Panasonic DMC-G2面世，首次將換鏡相機與輕觸式扭芒融合，影相拍片從此變得輕鬆，只需在輕觸式屏幕一篤便同步拍攝，將3吋扭芒變成快門掣，反應仲出乎意料地快，狂篤連拍玩景深話咁易。

試用過手機或DC篤芒影相就會知道，由對焦到快門閃動通常都慢人幾拍，所以巿面絕少見到大機以輕觸屏幕來取代快門操控，但G2卻在M4/3換鏡系統內加入Venus Engine HD II雙處理器，配合270度輕觸扭芒，大大提升篤芒對焦和快門反應。

採用M4/3換鏡系統，扭開鏡頭即可見到1,210萬像素Live MOS感光元件。	左邊機身的AFS/AFC/MF對焦轉盤，新增了人臉對焦、鎖定追蹤、多點或單點對焦選項。	G10外形與G2一模一樣，只是減省了輕觸扭芒功能。$6,290（連14-42mm鏡頭）、$8,290（連14-42mm及45-200mm鏡頭）。

入門者輕易玩景深

對攝影初哥來說，拎起大機最頭痛是面對複雜的操控，G2為此特別加入3吋輕觸式扭芒，無論想影前面的主角抑或後面的靚景，指住個位一篤就掂。換上大光圈鏡頭後，仲可以將對焦點收細，淨係Focus雙眼玩淺景深都冇問題，睇得唔清楚仲可以一篤局部放大10倍，咁就唔怕Focus錯隔籬，可說將篤芒操控與換鏡相機完美結合。

一按iA智能拍按鈕便會發出藍光，相機會自動根據拍攝場景調校設定，連拍片都可套用iA功能。

按一下Display即可轉成簡易目錄，方便新手篤芒調校ISO、白平衡、拍片等設定。

簡易目錄調校設定

今次新機連設定都可以篤芒搞掂晒，由於加入Lumix細機的Q.Menu簡易目錄功能，直接篤芒便能調校光圈快門、ISO感光度、白平衡等常用選項。嫌麻煩的話只要按「iA」智能拍按鍵，即可自動根據環境選用最佳設定，連認人先決、IR影像優化等功能都統統有齊。最吸引是拍720p高清片時，都可利用篤芒對焦，並套入「我的色彩」和自動場景等功能，玩法更加靈活。

拍攝720p高清片時可套入懷舊或菲林等模式，拍完仲可經HDMI直駁電視。	機背按鈕的功能和排列跟上代一樣，只是追加了Q.Menu按鈕。	G2只需加上接環便可使用4/3鏡頭、Leica M系列及R系列鏡頭，還可配收音咪和閃燈。

G系新機配件多

如果唔想玩篤芒的話，同場另有G2的孖生兄弟G10，分別只是G10省去了輕觸扭芒功能兼且只得黑色機身，售價仲平少少。兩款新機外加專用接環後，即可用回4/3鏡頭、Leica M系列及R系列鏡頭進行自動對焦，還備有收音咪、閃燈等攝錄配件，迎合不同用家的需要。

無論係影前面主體或後面背景，只要一篤即能快速對焦，還可用「Touch Shutter」直接影相。	換上大光圈鏡頭後淨係想Focus隻眼，只需收細對焦點的範圍，再篤一篤隻眼就影到靚相。	拍攝時還可篤芒作10倍局部放大，咁就唔怕鬆郁朦；掃芒睇相時還可將原相放大16倍。

機檔案

感光元件：1,210萬像素Live MOS

鏡頭系統：Micro 4/3

顯示屏：3吋270度輕觸式扭芒

攝錄功能：720p AVCHD Lite或Motion JPEG

快門：1/4000至60秒、B快門

感光：ISO 100-6400

其他：IR智能影像優化、iA智能拍、支援SD/SDHC/SDXC記憶卡

尺寸：124×83.6×74mm

重量：371g

查詢：2835 0955