將《Red Dead Redemption》稱為西部牛仔版《GTA》絕不為過，因為遊戲同樣由Rockstar操刀，照計都幾有睇頭。不過由於故事背景推前到1911年嘅美國西部同墨西哥，飆車打差佬變成騎馬打馬賊，再加上夠晒經典嘅保衞火車追逐戰，玩落都幾過癮！

為配合遊戲背景，《RDR》主角都係用上如步槍、霰彈槍同手槍等等上世紀嘅武器，另外仲可以用小刀或斧頭等作近距離攻擊，充滿西部牛仔風格。

地圖比《GTA IV》更大

《RDR》用上《GTA》嘅開放式世界設計，除一般任務外，仲有大把支線任務可以玩。據Rockstar講，今次嘅製作非常認真，兩塊美國西部地圖加上墨西哥版圖，面積比起《GTA IV》時更大，再配合加強版嘅RAGE Engine，畫面表現更加細緻，尤其係策馬奔馳上山欣賞日落，更非常有Feel！另外，遊戲亦整合咗Euphoria物理模擬引擎，人體動作做得夠仔細外，甚至馬匹以及鹿、狼、豹同獅子等野生動物都做到真嘅一樣，等錢使時更可以獵殺佢哋賺錢。

Dead-eye趁慢殺敵

野生動物就話可以任你狩獵，但如果亂咁開槍打人嘅話，就真係要三思，因為主角會好似《GTA》咁被通緝，就算走甩咗都好，暗花都會繼續累積，除非自己肯乖乖找數，否則就會引來更多人追捕。與此同時，《RDR》亦引入了類似「Bullet Time」嘅「Dead-eye」系統，能夠將時間短暫變慢，趁機做低身邊嘅敵人，另外亦可以先在目標上畫上記號，以便瞄準對方嘅手手腳腳嚟射，最啱用嚟生擒敵人。

遊戲檔案

類型：動作

開發：Rockstar San Diego

平台：Xbox 360、PS3

推出：5月21日

售價：$379（Xbox 360）

　　　$419（PS3）