可能之前嘅情人節、兒童節都未必關你事，但今日母親節，為人子女點敢當冇件事呢？身邊朋友還在煩惱買甚麼母親節禮物，計我話有乜嘢比每日一個電話更令媽媽開心，送手機就隨時可以揾到佢啦！
現時手機款式眾多，買來做母親節禮物真係花多眼亂，以下小記就以不同的應用作分類，為各位搜羅了多款適合媽媽使用的手機，方便大家按圖索驥！
銀髮型
特點︰針對年長一群，手機加入貼心功能，除了特大按鍵及字體外，還有電筒及平安鐘等。
長者專用 ZTE S202
此機特設超大、清晰的數字鍵盤，加上響亮鈴聲，方便長者準確無誤接聽及撥出電話。手機除內置電筒及收音機功能外，機背還設有「SOS」掣，只要向下推就能發短訊至5個預設號碼，並同時自動撥出求救電話。 它還設有服藥提示功能，夠鐘便會發出提示，記性差都唔怕遲咗食藥。
救命手機 Doro PhoneEasy 410gsm
手機只能打出、接聽電話及傳送SMS，規格一般，但勝在聽筒音量加大至+35dB，並兼容抗擾力達M3/T4級的助聽器，弱聽人士都用得。最特別是加入「平安掣」，只要長按3秒便會發出強烈「咇咇」聲引起途人注意，並自動致電到預設的電話號碼。手機由長者安居服務協會聯同CSL推出，提供「一線平安鐘」及「隨身寶」等服務。
貪靚型
特點︰年輕媽咪當然要揀外形美觀的手機，凸顯品味，最好還有多色選擇，方便襯衫。
粉紅美機 LG GD350
機身設計輕巧，僅重87g，放在Clutch Bag也輕如無物； 外殼為經過拋光處理的粉紅塑膠，還特設46款LED閃燈圖案，用戶也可自行創作10款圖案，盡情發揮創意。手機還提供大量女性專用功能，例如BMI計算器監察體重、Cash Book記下使費、Secret Memo則能秘密寫下心情札記，功能貼心。
彩爆卡通 Nokia 6700 Slide
鋁質金屬滑蓋機，具有藍、紅、銀、紫、綠、粉紅六色外殼，以大膽鮮艷的色彩取勝，媽媽見到冇理由唔心動。跟機有小克筆下聾貓圖案的桌布、功能清單，配合搞鬼歌詞做鈴聲，潮媽一定鍾意，而且可透過3.5G上網，或即時把相片上傳至Facebook跟親友分享。
慳家型
特點︰精打細算，為家庭格盡一分一毫，用最低價錢換取最多功能就至好，一於鎖定$2,000以下的平價手機。
性價比高 HTC Smart
全球首部Brew MP智能手機，整合電子郵件、網絡瀏覽及社群網站服務於一身，但身價卻比其他Smartphone平一截，性價比超班。難得是規格一啲都唔失禮，2.8吋電阻式屏幕，支援手寫繁體中文之餘，內置HTC自製的7頁式Sense介面，將時間、訊息、播歌及聯絡人捷徑全放在桌面，一按即開，唔怕媽咪唔識用。
入門篤芒 Samsung S5560
觸控手機普遍價錢較高，這款配備3吋26萬色Touch Screen的Samsung S5560，算是市面最平的選擇之一。它備有單指縮放技術，只需一隻手指便能放大縮細圖片及網頁，加上在屏幕寫上特定英文字母，便能解鎖或啟動預設功能，整體操作簡單快捷，媽媽很易上手。
購物型
特點︰女人邊個唔鍾意買嘢，最好一出門就搵到Shopping Mall，配備LBS定位服務的手機就至啱佢哋。
高速定位 Garmin-ASUS M10
定位速度媲美專業PND導航機，並預載了香港、澳門及廣東地圖，慳番一大筆下載數據費。手機提供60萬個附加資訊，例如商場、銀行、觀光點甚至油站等，每項都有詳細電話同地址，簡直係一條龍服務！佢內置的OpenRice應用程式，跟網頁版一樣睇到餐廳資料及食評，揀啱就立刻導航，搵食話咁易！
北上購物 Lenovo P707
地圖建築物分類多達130種，行到邊都能自動找出鄰近的商場、酒店、餐廳及油站位置 ，還有旅遊名勝簡介，堪稱手機版《Lonely Planet》。它還預載了多達31個中國省市及自治區地圖，有齊深圳、北京、上海、河北等熱門旅遊勝地，媽咪帶去東門Shopping揼骨都用得着。