「火山灰你幾時先肯散呀？」早前，愛吃刺身的友人日哦夜哦，怨歐洲冇飛機空運魚生到港。小記於是介紹他去西環，他反問：「去西環食鹹魚代替魚生呀？」第一，西環賣海味唔係賣鹹魚，為食都唔該有番啲Sense；第二，西環有間日本小店「久米田」，入口原條油甘魚（有圖為證），仲有比連鎖日式料理店更勝一籌的刺身與料理，從此西環唔再Dry！

位於西環的日式小店「久米田」，是大半條德輔道西上唯一的日本餐廳，周圍盡是海味店，令主打刺身和壽司的她更搶眼。負責人Jack哥稱，店名取自沖繩一個外島「久米島」，該處是度假和潛水勝地，他希望店子亦給人輕鬆Casual的感覺。

放大圖片	店子約有30個座位，裝潢簡單企理，一派日式小店風格。

原條入貨保新鮮

雖然幾乎是獨市生意，但選料絕不馬虎，除了前文提到的原條油甘魚外，還有原條三文魚，據大廚昌師傅說，一般日式食肆只會入口已分割的大魚，來貨多少便賣多少，不會浪費。而他們則每日返一整條重六至七公斤的三文魚和油甘魚，自家在店內起皮切肉，但點解要成條買呢？昌師傅說這樣完全因為要保證每日所賣的魚生是新鮮貨。此外，店子亦供應深海八爪魚、牛舌，前者爪上的吸盤比常見的淺水八爪魚細小，吃起來冇咁韌；後者乃牛舌近喉管部分，佔整條牛舌只三成，口感爽身，果然刁鑽有理。

刺身拼盤 $320 七款刺身共十七件的拼盤，有齊各款最受港人最受落的刺身款式，抵食夾大件。

a.牛脷串燒 $40 b.牛肋骨串燒 $120 c.燒羊架 $80 d.燒青花魚 $32 燒物水準證明大廚控制火候的功架十足，其中燒牛脷選用特別位置，吃來爽口而牛味濃。

必試海膽焗蟹腳

大廚昌師傅揀料有一手，炮製各式日本料理亦拿手，皆因他曾擔任水車屋總廚，有近三十年入廚經驗，最近與Jack哥攜手開設餐廳，更加入不少自創日式料理，最受歡迎的，非海膽焗蟹腳莫屬，昌師傅把握海膽食法多變的特質，將之煮溶混合醬料，釀在阿拉斯加或北海道鱈場蟹腳上再焗，上枱時芳香撲鼻，海膽的甘香、醬料的酸甜配合蟹腳的鮮味……不瞞你，小記都邊寫邊流口水。其餘各款拉麵烏冬、炸物、燒物等亦恰如其分，西區好「日」之士從此有飯堂了。

海膽焗蟹腳 $380 釀入海膽醬的蟹腳，芳香撲鼻；大廚更會因應當天來貨，而決定選用阿拉斯加抑或北海道鱈場蟹腳，後者的海水味更鮮更濃。	牛肉拉麵$32 選用牛小排起出來的肉來伴豬骨濃湯拉麵，牛肉入口肉味濃，脂肪分布平均；其他拉麵還有麵豉、醬油及泡菜湯底，由大廚選配最合襯食材供應。	海鮮湯飯 $28 豬骨濃湯盛着多款海鮮，淋上日本麻油令香氣撲鼻而來，令人胃口大開。

查詢：2857 3218