鍾意「掃街」，但怕路邊烏煙瘴氣；鍾意「掃街」，但嫌棄選擇太少。街頭小食既然受歡迎，位於將軍澳的商場東港城就睇準機會，招攬十間食店開設小食專區Food Point，地方乾淨企理，兼有新食店登場，大賣場內限定小食，咁有Point，唔掃唔得喎！

參照新加坡全天候模式的Food Kiosk美食概念來設計的Food Point，無座位設計有掃街風味，還不需擔心人車爭路，沙塵滾滾。十間小食店中，以專賣台灣小食的南城北市，及作蛋撻王副線的Tart Tart Yummy屬首度登場，其餘店舖則有限定小食推出。

Food Point內有十檔小食，環境企理乾淨，以後可以歎住冷氣掃街。

擅長炮製台南小食的台灣師傅，即席炮製美食如蚵仔煎，好吸引啊！

南城北市 正宗台灣味

要一次過食齊台南、台北美食，毋須驚人腳骨力，只需來到「南城北市」。由專賣台灣美食的華記永昌號開設，供應黑橋牌香腸、周氏蝦卷、府城杏仁豆腐冰及度小月擔仔麵等多種聞名地道小食，不止從當地運來食材、調味料，更專程請來台灣師傅即席炮製美食。

體育路杏仁茶 $10 杏仁茶香滑濃郁，並沒有一般杏仁食物的「膠」味，冰冰涼涼超解渴。

周氏蝦卷 $20/份 人氣老店招牌小食，用豬網油包着原隻鮮蝦香炸，油潤香甜但不肥膩。

砵仔王 心形砵仔糕

多得一套得獎電影，令老香港情懷重現，連帶砵仔糕亦再人氣急升。新店大搞噱頭，除繼續售賣馳名的信興隆砵仔糕外，更推出成斤重珍寶砵仔糕、心形珍寶砵仔糕等，預訂就有得食。另兼賣老字號公利真料蔗汁、大笪地欖王檸檬王、甄記叮叮糖等懷舊食品。

糖葱餅 優惠價$6/件 變得七彩繽紛的糖葱餅，有士多啤梨、杧果及朱古力味等。

心形砵仔糕$68起（一斤裝，需預訂） 造型令人眼前一亮，成功「活化」懷舊食物，入口煙韌、豆味香濃，巨型如生日蛋糕，不妨跟朋友齊齊食。

Tart Tart Yummy　潮食立體撻

蛋撻王新創的副線品牌，主攻年輕人市場。創業作有立體造型Yummy Tart，共有八款不同造型和口味，像紅咖喱雞、肉醬海鮮、黑椒煙肉及燒汁豚肉等，撻皮還用上澳洲鮮牛油等靚料炮製，食落特別鬆化。

其他食店一覽

‧Beard Papa's　　

限定食品：薄荷朱古力味芭芙

‧Just Hot Dog

限定食品：特大薯條

‧水研社　　

限定食品：1公升家庭裝古早味冬瓜茶、私藏紅茶及洛神冰茶

‧原味家作

限定食品：胚芽紅豆杏仁茶、抹香紅豆杏仁茶等16安士原味特飲

‧伯伯加奴

限定食品：特色新地窩夫筒

‧日船章魚小丸子

招牌食品：章魚小丸子

‧美珍香

招牌食品：秘製豬肉乾

查詢：2703 9346