公開試、校內試全部逼到埋身，又係阿媽煲靚湯嘅時候啦！

隔籬屋陳太個仔即將考會考，問我有乜靚湯可以補腦？咁啱尋日去睇葉英良註冊中醫師調理身體，梗係順便叫佢教我幾招啦！中醫學認為心主神志及腎主腦髓，故補腦益智，當從養心及補腎入手。陳太個仔係青少年，佢哋容易燥火，進補不宜燥熱，面對緊迫嘅功課和壓力，補腦之餘更應加入減壓寧神嘅中藥。

至於好似我個仔咁細個，原來適當進補都有助幼童發育，但係小兒肝常有餘、脾常不足，因此幼童補腦湯水要兼顧清肝和健脾。

幼童啱飲

夏枯草茯神核桃湯（4人分量）

材料：夏枯草1両、茯神1両、核桃2両、紅蘿蔔1斤、瘦肉1塊、蜜棗3粒

煲法：清水12碗煲2小時

功效：清肝明目、健脾安神、補腎益智、滋陰清熱

用腦要食腦？

大家成日講以形補形，唔通真係要食豬腦？葉醫師話：「中醫素有以形補形嘅講法，但一定要靈活運用。傳統食療認為食豬腦有補腦益智作用，事關豬腦含豐富膽固醇，而膽固醇正係構成大腦嘅重要元素；不過凡高血脂、高膽固醇、心臟病、動脈硬化等人士，絕對不宜進食高膽固醇食物。其實栗子、茯神、何首烏、銀杏葉、川芎、桂圓肉、黑芝麻、大魚頭等，已經係唔錯嘅補腦食物啦！」

青少年啱飲

何首烏銀杏葉川芎花生湯（4人分量）

材料：何首烏5錢、銀杏葉5錢、川芎5錢、花生3両、竹葉1両、豬(月展)1塊、桂圓肉1両

煲法：清水12碗煲2小時

功效：醒腦益智、活血通脈、補益肝腎、養血安神

金飾送畀好媽媽

下個月母親節，唔少人都鍾意送花畀媽咪表達心意，不過我就嫌唔夠實用，所以向來都會選購金飾畀叻婆婆。今年我已經鎖定目標，諗住選購Just Gold嘅「Heart Spray」系列，金飾以象徵快樂同忠誠嘅蒲公英為設計靈感，心形圖案係愛嘅種子，寄意藉住空氣散發無盡嘅愛，充分表現出母愛嘅偉大，真係連我都冧呀！

查詢：2895 7128

綠色方法驅蚊蟲

近排成日落雨，螞蟻、蚊蚊同小強即時出沒，要對付佢哋唔一定要用殺蟲水！原來螞蟻怕酸味，可以先把檸檬對切成兩半，唧啲檸檬汁喺螞蟻經常出沒嘅地方，仲要以有果肉嘅表面沿途塗抹，咁就有效趕走螞蟻啦！蚊子就怕辣味，可用紗布包住幾棵葱掛於窗簾上，作出成功攔截。至於我最驚嘅小強原來怕香味，將番梘切成細塊放喺容器內，注入清水，擺放喺小強出沒嘅地方就掂，想效果持續，記得定期補充容器內嘅清水呀！

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝