依家好多人成日打機上網，揸住滑鼠嘅時間，仲多過拎起枝筆，所以都好捨得花錢添置套啱自己嘅配件，如果你都想對自己好啲，就唔好慳荷包！
其實好似筆者呢類成日要敲鍵盤為生嘅打工一族，好應該買套舒適啲嘅「搵食架生」，最近Microsoft推出了幾款新鍵盤、藍光滑鼠甚至視像鏡頭，款式靚、手感好，連周秀娜（Chrissie）親身試玩後，都大讚藍光滑鼠好轆，放在手臂上都用得到！
唔做黑面神 LifeCam HD-6000
專畀Notebook用家使用的LifeCam HD-6000，既可做到720p及30fps高質素視像攝錄，最耍家係用上新研發的TrueColor技術，能夠聰明地分析用家四圍的環境及光源，自動進行調節，令所顯示的影像更鮮艷；亦可透過人臉辨識技術執靚個樣，唔使怕會「黑面神」上身。
同場另一款LifeCam HD-5000，功能大致跟HD-6000相同，如內置TrueColor技術及支援16:9 720p攝錄，不過鏡頭部分冇得左右兩邊扭。另一不同之處是機底用上支撐底座設計，可以平放在枱面之餘亦可夾在顯示屏的頂部，擺位靈活。
轆足8個月無線流動滑鼠3500
為方便外出使用，無線流動滑鼠3500將體積進一步縮小，連帶接收器都採用超微型設計，平時可收納在滑鼠底，唔怕帶漏。此外，一枚2A電池可玩足8個月，加上滑鼠底部備有獨立開關掣，可以更有效延長操作時間、同時推出灰及粉紅兩色，但略嫌顏色未夠搶。
藍光滑鼠普遍都較貴，想平玩的話，可以考慮一下這款有線舒適滑鼠4500，鼠身兩側加入了防滑膠墊，提供5個自訂功能按鍵及Tilt Wheel四向傾斜滾輪設計，並可在多種表面上使用。
26鍵齊發 SideWinder X4
掛得上SideWinder個名，想當然係專為打機而設。新推出的SideWinder X4鍵盤就引進新Anti-ghosting技術，可以一次過按下最多26個按鍵，兼能準確辨認出每項功能，要同時啟動幾個快捷鍵都冇難度，還具備巨集按鍵、防水濺及2ms極快反應時間等先進功能。
查詢：2388 9600