$4,580

F-04B 分體式手機

本文重點

變分機獨立通話
變鍵盤快打SMS
變Remote 遙控影相
機檔案

現時分體式冷氣機好普遍，但係分體式手機你又見過未？Fujitsu在今年春夏季，就幫NTT DOCOMO製造了一部可以分體的手機F-04B，而且分體後仲可以變多幾個特別功能，唔單止設計特別，還相當實用。

放大圖片

每季的NTT DOCOMO新機都會分唔同系列，好似玩分體的F-04B就屬於PRIME Series，大賣「Freestyle Design」概念，由Fujitsu生產，亦是今季的旗艦機。手機識得分體，最大好處係厚度同操作變化更多，鍾意薄機嘅人可以淨係袋住分拆後只得9.8mm的主機出街，夠晒靈活。

變分機獨立通話

F-04B合體時的外形跟一般滑蓋手機無異，可以實體按鍵和Touch Screen並用。所謂分體設計，即是屏幕和鍵盤部分可以拆開成兩個組件，每個組件各自有電池操作，不過SIM卡和microSD槽就設於上方的屏幕部分，可理解為「主機」；鍵盤部分分拆後，會變成QWERTY或數字兩用鍵盤，自動和主機以藍芽配對，變成個「分機」。最特別是在通話時，主機及分機都可以講電話，用家可按需要切換。

機底有一按鍵，一按即可分體。

鍵盤部分有藍芽指示燈，頂部亦設有聽筒位，分體後都可講電話。

上下組件的厚度差不多，只帶屏幕的上半部分更輕巧。

變鍵盤快打SMS

將F-04B拆開成兩部分後，最大的改變就是文字輸入方式。QWERTY鍵盤在手機分體後才會現身，有齊字母、功能鍵以及四方向鍵。除了可以輸入英、日文外，F-04B原生支援筆畫或拼音中文輸入，可惜只限簡體中文，但繁體中文SMS可以正常顯示，所以收到朋友SMS時，唔會因字庫不足而在訊息內容中出現一個個空格。

兩部分各自有電池，合體後備用時間會更長。

分體後，就會看見平時隱藏的QWERTY鍵盤。

變Remote 遙控影相

除了打字快及可以更Silm外，F-04B分體後仲有一個特別功能。由於手機的快門鍵及影相模式裏的快捷鍵都設於鍵盤部分，影相時就可以將鍵盤分機當Remote，控制範圍可達10米，影團體相就最啱用。另外，日系機最勁的美顏、美肌等影相模式，F-04B都有齊，就算影完相都可以再次執靚面色，難怪模特兒玩到愛不釋手。

支援筆畫輸入，不過只限簡體中文。	打SMS時可以分體操作，提升輸入速度。	用分機當Remote影相，可以揸得更定，可惜鏡頭位冇自拍鏡。
快捷鍵設於鍵盤分機，所以影相最好帶埋出街。	影完相還可加入後期製作，增添玩味。