全城期待嘅Apple iPad終於喺美國時間4月3日正式發售，最先推出嘅Wi-Fi版本，首日「只係」賣出30萬部，銷量明顯唔及當年嘅iPhone 3G。事隔兩日，iPad亦從水路到港，雖然被炒高至$6,800，一樣有大把人走落先達排隊等買機，吸引力唔弱。

有報道指，配合iPad推出嘅iBook服務，首日已錄得25萬次下載，即係平均每6名iPad用家，就有5個Download eBook睇，市場潛力不容忽視，可惜服務只是美國限定，本地用家暫時無緣試用，不過單靠iPad「快‧高‧長‧大」呢4個賣點，都有排玩啦。

機背設計簡單，但係有點跣手，而Apple商標亦好易刮花。

將iPad同iPhone拍埋，就大約估到iPad的大細。

上網反應快

iPad的Wi-Fi功能支援802.11a/b/g/n制式，只要訊號穩定，高速上網真係冇難度。採用1GHz A4處理器及iPhone都未有得用嘅3.2版OS，筆者試過開網頁，差不多3秒就Load完，操作真係好爽，快過iPhone 3GS好多！據聞，Apple將會喺聽日（4月8日）發表iPhone 4.0新版OS，話唔定iPad好快都會用上。

Load網頁速度十分之快，用Multi-Touch縮放同樣爽，抵讚！	主頁支援轉向功能，橫直度都可以顯示到20個App。	虛擬鍵盤最適合放在大髀或桌面上雙手打字。

高開上市

16GB Wi-Fi版訂價$499-$699美元（折合約$3,900-$5,500港元），但係香港水貨賣$6,800，高開7成，值唔值得高追真係見仁見智！話雖如此，iPad水貨「首賣日」短短幾個鐘就賣出超過30部，G-World老闆Lo哥仲話月底會繼續入3G版，唔知到時又會搶高幾多呢？

支援現有iPhone程式，放大兩倍打機感覺超好玩。	機身只有13.4mm，厚手機少少，十分纖薄。	用iPad睇YouTube效果非常順暢，打直睇片時介面好靚，只可惜唔支援Flash，睇唔到ontv。

使用時間長

年初iPad發表時，其中一個賣點係可連續使用10小時。筆者試用後，發覺新機雖未作首次充電，但即使無間斷連線狂試都玩到7個鐘，比iPhone長氣得多，待機時間更長達1個月，而且一開即着，唔使Boot機，用佢來上網方便又夠潮，尤其係有用開iPhone嘅用家，試過後都好難放低部機！

屏幕夠大

採用9.7吋屏幕的iPad，面積相等於6部iPhone左右，但係因為夠薄，拎上手唔覺重，而且大部分Apps都支援分割顯示，打機睇片效果一流；最好玩是虛擬鍵盤Size夠大之餘亦相當好打，處理文書工作都OK。

機檔案

處理器：Apple A4 1GHz

記憶體：16GB/32GB/64GB快閃記憶體

顯示屏：9.7吋、1,024×768、LED背光Multi-Touch

系統：iPhone OS 3.2

其他：10小時續航、iTunes/ Apps Store、屏幕轉向

語言支援：英、法、德、日、荷蘭、意大利、西班牙、簡體中文、俄羅斯

體積：242.8×189.7×13.4mm

重量：680g（Wi-Fi版）、730g（Wi-Fi+3G版）