電影《月滿軒尼詩》中，男女主角被親戚安排相睇，但各自心有所屬。後來，原本所愛的人讓他倆受了挫折，慢慢的，這對相睇男女就走得更近，終於，有足夠的空間讓愛情滋長。

現實情況中，相睇的對象多數騎呢，要不然，都不必來相睇。最普遍的是，相睇時雙方都面露不滿，相睇完畢就不再聯絡。能夠像電影中的男女主角那樣，相睇之後由普通朋友做起，真是非常難得。懂得與異性做普通朋友的人，就不必依靠親戚安排相睇啦！電影中，男女主角由相睇開始時反感，到最後愛情開花，真有點傳奇，但想深一層，選了湯唯做女主角，故事中的中坑宅男張學友會愛上她，一點不出奇。湯唯靚女有氣質，男人當然不介意和她做朋友、蒲茶餐廳、借小說給她看。這段情最後能成長，其實是因為相睇的女主角夠靚女。要知道，男人對醜樣的相睇對象，會多麼的殘忍。踏實姨媽朱咪咪那一小段，倒是很感觸，她一直得不到任何男人的青睞，當李修賢私下接觸她時，她以為自己可以與花枝招展的鮑起靜競爭。

女人都明白這一種震驚吧，自己的男人，對自己身邊那個不起眼的女人起痰。幸好，李修賢還是選擇了鮑起靜，要不然，喜劇都變悲劇。