DC機仔已經細無可細，唯獨功能愈玩愈多，以Casio為例，之前的動態合照已經夠好玩，估唔到新機EX-FH100更挑戰專業相機，可錄1,000fps短片之餘，仲支援每秒40張連拍！速度咁誇，今次就到海洋公園做實地測試，發現即使面對左搖右擺嘅海盜船，佢都可以將連環動作全部影低！

以人體肉眼嚟講，每秒25格嘅畫面已非常流暢，再高嘅拍攝速度，以常速播放就會變成慢動作。早喺年多前，Casio已憑半專業機EX-F1創下1秒60張連拍嘅驚人紀錄，如今更將此功能移植到DC仔身上。

提供40fps、30fps 15fps 及8fps等多種連拍速度，取景時可實時調校，毋須入Menu咁煩！

放大圖片

連拍影爆卡

論速度，雖然EX-FH100冇咁誇，但都做到每秒40張連拍，全因佢搭載咗High Sensitivity CMOS感光元件，在有限光源下都能保持相片清晰。實試時發覺個Shutter冇乜時滯，而且還提供預拍模式，按快門前會先影低30張相，至啱喜歡「捕風捉影」嘅朋友使用。另外，很多連拍機為顧及存相速度，都會把像素降呢，但此機緩存有成85.9MB，因此連拍時都Keep到900萬像素，最重要是毋須回氣，可以一口氣影到爆卡為止，爽快！

1,000fps拍片時解像度只有224×64，想提高畫質就要選擇120fps、420fps或較慢速度。	相機預設是單張拍攝，但只要按下機頂的連拍鍵，便可一口氣連拍40張。	機背右上角多咗個攝錄切換掣，按一下就可由常速變成快速拍片。

慢動作重播

連拍以外，此機嘅拍片能力都甚為強勁，除可拍攝1,280×720p高清影片外，仲可錄製1,000fps極速影片，比正常電影格數還要快40倍以上！重播時一切動作也如Slow Motion般，就算肉眼捕捉唔到嘅景物，好似篤爆氣球、子彈橫飛等場面，喺佢面前都如實呈現。惟留意1,000fps時解像度只有224ｘ64，想提高畫質就要降速至210fps或420fps，機背更設有專用按鈕，方便由「常速」切換成「快速」拍片，快慢隨你喜歡。

連環快拍 一次過連拍40張都影得好細緻，抽出第10、25同40張，就可以清楚睇到海盜船嘅搖擺過程。	放大圖片	放大圖片

多種快拍模式

EX-FH100本身規格都有番咁上下，提供1,010萬拍攝像素、10倍光學變焦、24mm超廣角鏡頭等，不過最抵讚還是它將「快」這特點放入不同Best Shot模式內。其中一個叫「高速連拍照明效果」，可一口氣連拍三張相，記錄標準、明亮及昏暗三種曝光情況，然後將它們合而為一，從而得到最完美嘅光暗效果。它還提供運動、動物等不同連拍模式，無論影車影寵物都應付自如！

連拍照明 水母館燈光不足，好多人會推高ISO再加大光圈影，但咁樣好易爆晒光。相反，用「高速連拍照明效果」就會影到光暗適中嘅水母仔，好鬼死靚！

動物Best Shot 試用動物連拍Best Shot，即使隻「隼」頭擰擰，都影到佢啲羽毛一清二楚。

機檔案

有效像素︰1,010萬像素

拍片像素︰1,280×720（30fps）

光學變焦︰10倍

顯示屏︰3吋23萬像TFT

體積︰105×63.2×29.9mm

重量︰227g

查詢︰2926 2300