提醒自己不要亂花費，於是，買衫的標準是，只買最靚的貨色，要一見鍾情，要驚為天人，總之，要靚到絕才付錢。我的理想是，令這件靚絕的靚衫成為珍藏，穿許多年都不會厭。

朋友卻說，就算我以為這件衫是靚到盡，但幾個月後總會有更靚的衫優勝於它，衫嘛，永遠有更靚、更合心意的，那麼，自然就會貪新厭舊，曾經靚絕的那件舊衫，只好被打入冷宮。想想都有道理，企圖把對一件衫的愛伸延至永恒，實在很有難度，尤其是淺色的衫，不到兩年就變霉，再靚都會走樣。

也許，最佳的做法是，定下一個金錢限額買靚衫，當一件衫超出某個價錢，就完全不考慮，完全地漠視。那麼，擁有的衫都不會太貴，當這件衫變色變舊後，要捨棄它之時，不會那麼心痛。皆因我的要求是絕色靚衫，那麼，在某個價錢的限制下，其實未必能買得到。嘩，買不到更好，變相慳錢。

其實，我有心對自己的靚衫表現出忠心的態度，希望永遠留它在衣櫃內，希望永遠覺得它最靚。但想深一層，對一件衫忠心和執着，是那麼不必要的事，何苦呢，天下間那麼多靚衫。