睇過《買兇拍人》、《靈動》甚至自拍的笑笑小電影，大家都見識到DV拍片的苦況，一係自拍時畫面背光走晒焦，一係行來行去鏡頭震到暈，睇完眼都花。Canon在全新LEGRIA HF M31上針對性地加入篤芒追焦和超級防震功能，內置31種自動場景，篤一吓個靚樣便會自動因應環境調校光暗色調，以後可以食住爆谷睇自拍大作。

自Canon推出LEGRIA系列攝錄機以來，主要走輕巧、高畫質路線，好似剛到埗的HF M31全高清攝錄機，便採用32GB Flash記憶體及SD/SDHC插卡設計，配合輕觸式操控大大減省不必要的按鍵，令機身輕到只得320g，加上沿用Canon鏡片及DIGIC影像處理技術，真正發揮機細功能強嘅優點。

帶埋個WP-V2潛水殼再配合內置的水底模式，就可潛落40米水深拍高清。售價：$4,480

HF M31內置32GB Flash記憶體，可外加最多32GB SDHC記憶卡，拍足24小時都冇問題。

31種場景 自動追焦

自動場景功能在數碼相機上就玩得多，但對於動態影像來說，需要因應移動景物即時變換設定，難度自然更高，HF M31便追加7種「移動中人像」模式，令預設場景多達31種。除了能快速轉換人像、風景和微距外，當主角在鏡頭下穿梭走動，由藍天轉向背光、明亮轉到陰暗等拍攝環境，此機都能自動調校至最佳曝光、白平衡和對焦設定，令拍片變得更簡單。

手掌咁細的高清攝錄機都有Hotshoe，還可自行加裝收音咪、攝錄燈等強化配件。

篤芒操控都幾食電，帶去旅行時建議配多一粒高容量電池。售價：$650（BP-819）、$850（BP-827）

180˚扭芒 輕觸操控

不過就算新機功能勁到曉飛，都要提供簡易操控介面才能迎合大眾要求，因此Canon在HF M31中創新地改用2.7吋輕觸式屏幕，將複雜的按鍵和設定掣刪除。拍大合照時只要篤住主角個靚樣，鏡頭便會追住佢來轉換至合適場景模式，又可以篤芒調校色溫或補光等進階設定，最吸引是屏幕能夠180˚反轉，去旅行自拍時反芒操控就更方便。

拍片模式、曝光補償和白平衡等全由篤芒選擇，減省不必要按鍵，令機身更輕巧。	只要篤一篤個靚樣，無論對方行到邊，鏡頭都會追住影並自動變換場景。	屏幕可作180˚反轉，扭芒玩高炒低炒，甚至港女十式自拍高清片再冇難度。

15倍變焦 超級防震

平時邊行邊拍片，鏡頭都會晃動得特別犀利，更何況HF M31擁有15倍變焦鏡頭，Zoom盡595.2mm拍遠景隨時震到頭都暈，好彩新機貼心地強化了Powered IS防震功能，利用動態光學穩定系統，減輕手震和遠攝時常見的低頻震動。同系另有HF M31的孖生兄弟HF M300，無論外形和規格都一模一樣，只是後者減省了32GB Flash記憶體，全靠SD/SDHC記憶卡攝錄高清，以現時一張32GB SDHC只係六百多元計算，似乎買多幾張卡更抵玩。

Zoom盡15倍光學變焦時，連維港中心的帆船都見到，初時畫面搖來搖去頭都暈埋，但開啟Powered IS功能後，低頻震動明顯減少。

由遠處Zoom埋去太空館，自動對焦速度明顯比上代快，而且影相都有331萬像素，去旅行一機搞掂。

機檔案

感光元件：389萬像素 1/4吋CMOS

視頻格式：1,080/50i 全高清AVCHD制式

儲存媒體：內置32GB Flash加插卡（LEGRIA HF M31）

　　　　　SD/SDHC插卡（HF M300）

屏幕：2.7吋輕觸式屏幕

鏡頭焦距：39.5-592.5mm（15倍光學）

尺寸：68×60×123mm

重量：320g