全球三大相機展之一的CP+（Camera & Photo Imaging Show），昨天於日本完滿結束，傳聞已久的Sony換鏡DC終於現身，連失驚無神彈出來的Panasonic G2、Olympus PEN新機都可以任試任玩，看來換鏡細機來年勢必大熱，趁住現場有咁多「卡娃依」Model，梗係第一時間影餐飽。

前身是日本最大相機展Photo Imaging Expo的CP+，今年首次由CIPA自行舉辦便吸引全球七十七間參展商，包括Canon、Nikon、Sony、Olympus、Panasonic等龍頭大廠都來擺設攤位，齊齊打造國際級攝影及影像展覽，與美國PMA及德國Photokina並列三大「影」壇盛事。

M4/3陣營捧平機

今年焦點落在換鏡細機身上，Micro 4/3（M4/3）陣營就有兩款平機亮相，當中Panasonic G2比上代多了180°輕觸式扭芒及高清拍片功能，高炒低炒任何角度都影得更自在；另一款Olympus PEN LITE E-PL1則以簡易操控和多款濾鏡為賣點，筆者仲拎住部新機在日本搵靚景實試新功能，明天再作詳細報道。

Olympus 冠軍分享Olympus特別請來日本溜冰冠軍淺田舞，分享佢使用PEN LITE E-PL1拍攝旅遊照的經驗。	Panasonic G2外形與上代G1H接近，支援180°輕觸式扭芒，自拍都得。	拎住Olympus新機PEN LITE E-PL1响日本四圍搵靚景拍攝，想換機嘅話，就要留意明天嘅報道。

Sony換鏡DC有樣睇

此外，繼Ricoh和Samsung後，連Sony都拆掉反光鏡，自行推出「Mirrorless」機仔，三色金屬機身拎上手只係普通DC咁輕薄，雖然唔可以試拍，但聽現場講解就話將會有新的鏡頭及操控方式，方便影相兼拍高清短片，值得期待。

Sony換鏡DC備有紅、藍、銀三色機身，相信會推出轉接環接駁其他廠鏡頭。

白色Prototype外形與真機一樣，而台上正在講解其介面及高清拍片等功能。

Pentax / Sigma晒勁機

介紹換鏡相機當然唔少得DSLR嗰份，仲要一係唔出，一出就係Pentax首部中片幅645D大底機，內建4,000萬像素大CCD及雙卡槽，唔使再捱昂貴的哈蘇及數碼背。另一款則是由08年公布，等到今年才有真機試玩的Sigma SD15，利用1,400萬像素Foveon X3感光元件來提升影像質素。

等咗足足兩年的Sigma SD15，採用1,400萬像素Foveon X3感光元件，Sigma粉絲係時候升級。	Pentax中片幅645D備有數碼背及4,000萬像素大CCD，依家切開一半就睇得更清楚。	中片幅尺寸的Pentax 645D，可以曬到成個人咁高的相，感覺與平時的135相機有些少分別。

搞鬼場景 試機影女

筆者不得不佩服日本人的創意，搞個相機展唔單止多新機，連吸引人圍觀試機的招數亦特別多，有些布置到成個遊樂場咁款、部分仲Set晒燈任影，甚至成個球場搬入去，絕唔似香港得Show Girl行行企企咁普通，稱得上是影友天堂。

Sony足球場食住世界盃熱潮，Sony設置咗個小型足球場，讓影友們試用Alpha相機連環快拍Model踼波英姿，小記都忍唔住手影咗幾張。	Canon遊樂場呢個唔係遊樂場，其實係Canon的試機專區，舞台360度慢慢轉動，影友們未影相已暈晒大浪。	Panasonic行貓步當然唔少得別開生面的花生騷，Model拎住部Panasonic換鏡M4/3新機G2，玩完扭芒又玩自拍，再加S形甫士。

CP+ 2010相機展小資料

日　　期：2010年3月11至14日

展　　場：日本太平洋橫濱國際會展中心

面　　績：20,000平方米

入場人次：近50,000人

入　費　場：1,000日元