男仔玩玩具，繼士兵公仔之後，最Hit一定係機械人，只不過玩親唔係高達就係超時空，似乎太崇日。不過近年Hot Toys製作嘅Iron Man 12吋Figure水準甚高，為配合電影第二集宣傳推出嘅新款War Machine，塗色上乘兼骨架精確，製作媲美Bandai Perfect Grade高達系列！

金屬色似足超合金

《鐵甲奇俠》電影全球大收，第二集鐵定五月份全球公映，預料票房更勝第一集，有見及此，日本壽屋及Marvel都已經推出玩具造勢。為第一集出過六款Iron Man的Hot Toys，當然不會放過掘金機會，今次特別為War Machine打造全新模具，單計誠意已值回票價。上色繼續由大師JC. Hong負責，雖然原料是ABS塑膠，但塗上啞灰色後，整套厚裝甲充滿金屬感，唔拎上手還以為是超合金魂！一如主角Iron Man般，War Machine的雙眼、心口和雙掌均可發光，HT亦在這些部分加入亮燈裝置，而且為配合不同造型，其中一雙手掌更可郁動手指，握拳話咁易，如此設計在1/6 Figure中非常罕見。

火神炮能作多方向轉動，仲有滑軌方便橫移。	手指加入關節，令Figure可以隨意握拳，12吋Figure界罕見。	腳背藏有AirBrake，內裏用上蝕刻片，仔細度高。

人形移動炮台

原著故事中，War Machine由Tony Stark的上校好友Rhodey操作，今次電影易角由演員Don Cheadle擔演，Figure兩款頭雕之一便可掀開面蓋，露出真人容貌。就首辦所見，在Kojun的刀工下，頭雕起碼有八成似，較之前的Tony Stark頭雕更出色。武器方面，話明係War Machine，自然全身武器，除兩邊膊頭可換上飛彈匣、前臂可裝機關槍外，背脊還有大大支可轉動式火神炮，駁口處設有滑軌方便左右移動，驟眼看猶如高達世界中的「吉姆大炮型」。官方表示，Iron Man Mark Ⅳ、大奸角「鞭狂」和Black Widow都會緊接推出，加埋改版，相信數量足夠Fans買足一年！

雙臂都可加裝機關槍，又可整支拆除。	面罩內藏磁石，揭開後可見演員Don Cheadle的容貌。	Figure一身重裝甲看似笨重，其實關節位多達36個，靈活性唔差過高達模型。
附送專用地台和四對手掌，但其中一對既有手指可動功能，多送的三對手掌便意義不大。