好多人都以為女生對科技產品不感興趣，但實情剛好相反，好似手機、MP3、Netbook等數碼產品都不知幾受女生歡迎，連傳統上屬男孩子玩意的數碼攝影，近年都多了女生參與。市場觸覺敏銳的廠商亦積極開發一系列專為女生而設的DC或DSLR，從款式設計到功能取向，都更貼合她們的需要。

唔同人有唔同喜好，雖然話女生大多貪靚，小巧纖薄、色彩鮮艷的卡片DC通常大受歡迎，不過也有部分女生追求較佳的質素和拍攝功能，因此無論是輕便的DC，或是專業的DSLR，都各有所愛。

卡片DC玩創意

現時卡片DC的硬件規格都差不多，同樣配備高像素和靚靚大芒，想突圍而出就要加入一些如雙芒自拍、相片特效、瘦面美顏等易用又有趣的功能，才可以取悅女生。

同麥兜影合照EX-Z90特別版

Casio跟本地卡通人物Crossover，推出EX-Z90×McDull限量特別版，全球限量發售999套。除了在機身上印有麥兜圖案外，更預載麥兜開機畫面，以及三款麥兜動畫拼貼圖案，女生可以跟至愛的卡通人物影動態合照，隨機更附送多款精美禮品。

一掃影全景相Cybershot TX7

潮流興玩拍片，不過對女生而言，拎着大大部的DV機會有點吃力。Cybershot TX7機仔細細，卻可以做到AVCHD全高清拍片之餘，仲有埋智能一掃全景相片拍攝模式，可選擇左、右、上、下四個方向拍全景，按實快門打橫一掃就影晒維港兩岸風光，影風景就最正。

篤芒眨眼自拍IXUS 210

同樣以自拍功能為賣點的，還有Canon這部IXUS 210，其自拍模式新加入了「眨眼自拍」和「笑臉自拍」功能，咁就唔怕影到合埋眼、反白眼、手震等醜怪相片。此機配備3.5吋特大輕觸PureColor II屏幕，可篤芒操控閃燈、功能、白平衡等選項，甚至設定對焦點，夠方便快捷。

平價DSLR玩高階

要女生長時間拎住部「大牛龜」數碼單反周圍走，實在是吃不消。不過近年為了迎合入門用家及女性市場，廠商都開始推出輕巧的DSLR機種，功能與中高階的型號相差不遠，售價更極具吸引力。

數碼E沖C扮Lomo

有人影相追求清、靚、準，也有人鍾意玩藝術風格。Pentax K-x除咗大玩機身顏色外，更加入「正負逆沖」模式，模擬菲林E沖C（正片負沖）效果，有趣的是拍出來的相片，每張都有不同效果，極有Lomo味道。此機支援11點對焦及ISO 12800高感光度，更有多達9次多重曝光及HDR相片合成，真係點玩都得。

270度扭芒低炒Nikon D5000

Nikon入門機D5000新加入270度扭芒Live View取景，高炒、低炒一樣咁方便。此機雖屬入門機種，但規格卻直逼中階的D90，備有11點Multi-CAM 1000自動對焦系統、3D追焦等功能，主動式D-Lighting更可選擇自動、超高、標準及低這4種級數，在高反差地方拍攝可加強暗位和光位的細節。

雙芒孖公仔Mirror PL150

雖然家陣好多DC都具備自拍功能，不過講到方便，始終唔及雙芒設計的Samsung Mirror系列。新型號PL150的規格同上一代差唔多，但就加入了「Twins Shot」功能，玩雙人自拍時只要頭部一拍埋，相機就會自動拍攝，也可將前置的1.5吋屏幕當鏡用，校啱角度先按掣，就包冇閃失。

慳電王長影長有Coolpix L110

DSLR雖然感覺好專業，但成日要換鏡，女生拎住咁多器材出街，少點臂力也不行。Nikon最近就推出一款半專業級新機Coolpix L110，採用28mm廣角鏡、提供高達15倍光學變焦，無論遠近都影得一清二楚，亦可拍攝720p短片。另一長處是極慳電，只需四枚AA鹼性電池，便可以連續拍攝500張相片，去旅行更加實用。

媲美換鏡高清DV Canon 550D

同為入門級數碼單反的Canon 550D，則以全高清拍片為賣點。此機大幅改良高清拍片功能，除可拍攝每秒24格的1,920×1,080影片，更有趣的是加入「短片裁切」功能，唔使換鏡就可將焦距放大7倍，剪裁成640×480標清影片，並內置了Mic頭加強現場收音，質素媲美換鏡高清DV。