近年人人將環保掛在口邊，但去年底的聯合國氣候會議上，中美雙方卻就碳排量僵持不下，結果至今仍沒有明確的減排目標。與其等大國出手，不如身體力行用環保手機。新出嘅Sharp SH6230C比以前推出的同類手機更加徹底，事關佢裝有太陽能電池板，舉高手對正太陽就可充電，行山帶埋去，蕩失路都唔怕冇電求救！

雖然最近豐田車廠事件打爛咗日本貨嘅金漆招牌，但哈日族依然大有人在。Sharp看中這點，早於2008年6月便首次以「AQUOS手機」品牌進入中國市場，至今已發表過多部2G手機，而日前再將日本大賣的環保手機936SH，倒模在中國推出。

放大圖片	鍵盤用無縫設計，而且面積幾大，好按！	雖然鏡頭降呢到500萬像素，但仲有自動對焦同29mm廣角，影相質素好過唔少DC仔。

曬半個鐘傾一分鐘

日系手機一向多花臣，Sharp SH6230C最搶眼之處，一定係機面塊太陽能電池板，官方稱之為「Solar Hybrid」，說明書話只要用太陽曬佢30分鐘，就可額外提供一分鐘通話時間，仲可以備用兩小時。小記趁住好天帶佢出去「曬太陽」，結果曬唔夠半個鐘就升咗3%電量; 之不過電池板只能辨認到紫外光，因此只對太陽光有效，用電筒照就冇反應。機面亦特設一盞指示燈以顯示太陽能級別，對正太陽就着綠燈快叉，烏雲密布就變成藍燈慢叉，叉電快慢一目了然。

microSD插槽設於機側，毋須拆蓋拆電更換。	附送2.5mm純白耳機，但音質一般，想用回自家3.5m耳筒就要用轉插。	只要按一按鍵盤左下角嘅節能鍵（紅圈），屏幕亮度就會校低一級。

亮度調校一按節能

除咗太陽能充電，SH6230C還備有智慧節能模式，開啟後就可把通話同拍照用電量減到最少。另外，數字鍵左下角設有一個屏幕節能鍵，按一下就將屏幕亮度降低一級，雖然睇落冇咁舒服，但日光底下就依然清晰。據官方文件指出，在多項節能技術配合下，手機的備用時間可延長至470小時之久，差不多比同系機款襟用一倍以上。惟留意利用太陽能叉電時，機身頗為「辣」手，唔係人人頂得順邊叉邊講電話。

放大圖片	提供拼音、筆畫輸入法，入中文更得心應手。	內置省電模式，把通話及影相功耗減到最低。

毋須解鎖插SIM即用

日版936SH有個3吋854×480解像度大芒，估唔到變成SH6230C後，質素竟然下降，只有2.9吋400×240解像度，講真睇片冇以前咁爽。最慘係其他規格亦順勢下調，例如冇咗防水功能，鏡頭像素也剩下500萬等等，猶幸後者依然支援場景識別同人臉對焦，Snapshot總算夠用。當然在祖國推出，令它擁有其他日系機冇嘅賣點，首先係毋須Hyper SIM解鎖，任何SIM卡都能即插即用；另外就係提供筆畫及拼音兩大輸入法，唔使靠日文漢字都打到中文！

既然面向祖國，又怎少得QQ份呢﹖

雖然屏幕比日本原版縮咗水，但仍維持一定質素，睇片時顏色幾分明，木村件黑色衫冇黐埋一舊，絕非山寨機可匹敵。

機檔案

制　　式︰ GSM四頻

屏　　幕︰ 2.9吋26萬色ASV，240×400解像度

鏡　　頭︰ 500萬像素CMOS

記　憶　體︰ 支援microSDHC記憶卡

對外連接︰ 藍芽2.0、USB 2.0、GPRS、EDGE

通話時間︰ 220分鐘

備用時間︰ 470小時

體　　積︰ 115×51×19.7mm

重　　量︰ 135g

查詢︰2374 0618