年十五都未過，仍屬新正頭，查實似乎不應該介紹以「兇案」掛帥的新PS3冒險遊戲《Heavy Rain》，但係遊戲故事引人入勝，玩法特別，似足一套高質素嘅荷里活懸疑片，實屬唔玩唔得的佳作，所以都係百無禁忌玩咗先算！

故事講述四個本來各不相識的角色，因為一宗兇案而互相牽連，玩家更要輪流扮演這四個角色解開謎團，不過先旨聲明，遊戲內充滿暴力、色情同死亡等黑暗面，所以要十八歲以上先玩得。

死咗都要繼續玩

《Heavy Rain》題材吸引之處係以一宗連環綁架謀殺案作主軸，將四位唔相識嘅主角牽引入內，帶出驚慄的情節。遊戲中四位角色分別係兒子被綁架嘅建築師Ethan Mars、FBI調查員Norman Jayden、私家偵探Scott Shelby同女記者Madison Paige，玩家要在四日內輪流扮演這四個角色去查案，更要以生命作賭注，皆因過程中隨時會冇命。不過就算其中一個角色死咗都好，故事都會繼續發展落去，由其他角色接棒；但要留意遊戲中每個決定都會對整件事起着不同程度的影響，衍生出不同的結局，據資料講，最快可於四小時內揭開其中一個謎底，但要玩晒所有結局就要花唔少時間。

玩到冇頭緒，可以按掣叫出可下達嘅指令，繼續進行遊戲。	行版遊戲以英語配中文字幕，更易明白故事的推進。	建築師（右）的兒子被綁架，所以遊戲內只見佢全程愁眉不展。

搖掣肉搏或除衫

遊戲題材同表達方法都算去得盡，唔會就住就住，劇情就加插咗好多黑暗面元素：例如私家偵探搵妓女尋找線索時就要同嫖客大打出手，又爆樽又見紅；FBI又要喺兇案現場檢查屍體；至於香艷鏡頭就交由女記者處理，據講有一幕更要玩家不斷搖六軸無線手掣幫佢除衫。遊戲嘅操作方法其實都唔複雜，要做決定時畫面會顯示出適當的按鍵，玩家在限時內輸入正確指令就可完成動作，例如右轉Analog掣來開車門或在身上搜尋物件；搖手掣就可在肉搏時甩身或幫女角除衫；至於打交或者要爬上山坡時，就要好似玩手指層層疊咁交替按掣。

打鬥場面經常出現，只要控制得好，幾十歲嘅私家偵探都未必唔夠精壯嘅嫖客打。	遊戲內設有分割畫面場景，電影感甚重。	FBI調查員戴上黑超後，視點會變成黑白，唯獨線索會以橙色顯示，唔怕睇漏眼。

荷里活電影格局

最值得一讚係遊戲造得好有荷里活電影格局，人物性格相當立體，每人都有隱疾及不為人知的黑暗面；角色造型亦夠逼真，近鏡時更可見到清晰的鬚根；打架時亦會因受傷程度而出現唔同變化，眼腫面腫又或者額頭滲血。另外遊戲的分鏡更似足電影，最抵死係會用上分割畫面來呈現現場不同角色的視點同感情變化，從中窺探劇情的進展，愈玩愈入局，隨時坐低連玩幾粒鐘都停唔到手。

呢副高科技黑超亦可幫大家發現好多肉眼見唔到嘅蛛絲馬迹。	遊戲採用成人向設計，女記者要落Disco查案都好合理。	女記者Madison負責露肉套取資料，不過男記者冇需要咁做。

機檔案

類型：驚慄冒險

開發：Quantic Dream

平台：PS3

推出：2月23日

售價：$358

查詢：2341 2356