俗語話：「爆竹一聲除舊歲」，新年又點少得欣賞美麗綻放的煙花，不少巿民更一家大細帶齊相機腳架拍攝動人時刻，其實唔單止DSLR可拍到璀璨煙花，近年新推出的DC仔都加入手持夜景、廣角全景和特效功能，只要加些少技巧和配件，機仔都可影到靚相。

要在漆黑夜空捕捉煙花盛放的一刻絕不容易，一來怕手震鬆郁朦，二來總見粒粒雜訊，莫講話玩構圖玩特效，連普通煙花拍攝都考起不少影友。因此今次小記特別歸納了五招技巧，基本上識得用腳架、慢快門、低ISO，你都可以變成煙花攝影達人。

第一式：腳架長時間曝光

煙花由射上天空、爆開到盛放通常都超過一秒時間，手持部機咁耐唔震至奇，但高速連拍又捕捉唔到煙花散開的線條美感，幸好巿面有不少腳架仔，方便摺合攜帶。若備有手動曝光DC，大可收細至f/5-f/16光圈，將曝光時間延長至幾秒鐘；而使用全自動DC的話，則可調至夜景或煙花模式，就同樣得到慢快門效果。

第二式：低ISO唔怕起粒粒

長時間曝光的另一難處，是在漆黑背景下總會出現雜訊，曝光愈耐就愈多，因此想影到大師級靚相，建議將ISO調至100或以下，寧願用腳架長時間曝光來提升畫質，而且用家可先預定對焦至「無限遠」，咁就唔怕追唔切或對錯焦。

第三式：廣角魚眼夠特色

煙花慣常由三艘躉船發放，想影萬花齊放嘅壯觀場面，甚至以維港燈光做背景，大可配合廣角或全景拍攝。巿面有些專為DC細機而設的鏡頭配件，安裝在鏡前便可達到21mm超廣角或魚眼變形效果，部分新款DC更內置全景拍攝模式，一掃便可盡覽維港美景。

第四式：慢快門後閃影人

難得有大量煙花陪襯，當然要與心愛的人影相留念，不過用腳架慢快門影得煙花來，人物又鬆又黃，這時可利用閃燈的Slow Sync功能，在快門關上前補一下閃燈。如果DC沒有熱靴或閃燈的話，可在機旁擺一支外置閃燈，在慢快門曝光時，手動按一下閃燈，達到人景合一的效果。

第五式：黑卡豐富煙花海

不少專業攝影師捕捉煙花時，都會帶備黑卡來豐富畫面，利用長時間曝光將幾幕煙花結合於同一張相片內。由於每幕煙花之間常有「間場」，這時大可用黑卡遮蔽鏡頭，待第二幕煙花出現時才拎走黑卡繼續曝光，出來的效果自然繁花盛放。如找不到黑卡，可用隨身黑色銀包、風褸等代替。

查詢:（a）2185 7791、（b）3191 2333、（c）2292 5111、（d）2406 3225、（e）2345 2966、（f）2926 2300、（g）2833 0955