老爺奶奶話要返大陸玩幾日，今年全權交由我負責辦年貨，買其他嘢都算，仲叫我揀瓜子添，救命呀！
早幾日專誠「遠征」荃灣，請教上海陸金記瓜子大王負責人陸賽飛揀靚瓜子秘訣。陸生話瓜子講求色、香、味美：「首先留意瓜子夠唔夠平身，因為太彎會難於剝殼；亦盡量唔好揀表面太令身嘅，因為好多商人為咗令瓜子襟擺，會喺表面打蠟！其次要睇瓜子肉身係咪呈奶白色，若果太黃及中央呈黑色都唔新鮮，而且瓜子肉亦要夠厚同鬆脆，食落先夠香。殼身要軟硬適中，太硬好難咬，太薄又易咬碎，最理想就係一咬外殼即兩邊分開。」
講開揀瓜子當然要教埋大家正確食瓜子方法，陸生話瓜子經過醃製調味，尤其係黑瓜子好多時都係靠外殼嘅醃料增加味道，所以正確食法應該係放入口中，利用大牙輕輕咬破外殼而食瓜子肉。
小貼士：點存放瓜子？
將瓜子先放入膠袋，然後再入紙袋保存已經掂，陸生仲提醒大家：「瓜子用嚟食唔係用嚟擺，一般建議客人於三星期內食晒就最好！」
某酒樓嘅傳統係大年初一會向客人派利是，我都攞過幾年o架！
嘩，大年初一出街食飯免加一，仲有人畀番錢你轉頭呀！開頭叻生講我都唔信，後嚟有一年佢帶我去稻香飲茶，先知佢哋由八年前開始，逢年初一都會向顧客派利是。一如過往，今年大年初一幫襯稻香集團旗下香港分店嘅食客，每人將獲$10現金利是一封。當日於集團旗下食肆，即客家好棧、潮樓/潮館、鍾菜、上樓、HIPOT 及HITEA巧味分店，均免茶、免芥、免加一，仲唔會收取任何額外附加費，真係好抵呀！
日期：2月14日
時間：全日
地點：稻香集團旗下全線香港分店
網址：www.taoheung.com.hk
花開富貴超豪靚
平日好少响屋企插花，怕阿仔唔覺意打爛花瓶，不過新年期間另計，我都會擺啲靚靚年花應節，有靚花自然要靚花瓶，我專登去尖沙咀Lalique睇吓佢哋新出嘅「富貴牡丹」花瓶，瓶身設計係牡丹花，外形真係富麗堂皇。用一個咁靚嘅花瓶插花，係人都會讚你有品味，不過……我唔敢買呀，你估我唔怕C6「哦」呀！
查詢：2234 7333
買生肖Tee攞利是封
同叻太差唔多年紀嘅，對Esprit都會有啲情意結，你有冇去過當年興發街嗰間Esprit呀？學軟硬首歌咁唱：永遠懷念！估唔到佢哋今年出咗一批生肖圖案Tee，仲請咗風水玄學大師周芷毅師傅，為12生肖推算來年運程及趨吉避凶方法，揀啱衫就知來年運勢啦！依家購物淨價滿$600，更可獲虎年利是封一套及價值$100嘅Esprit優惠券一張添！
查詢：2377 9114
瓜子大王教你揀靚瓜子！
年初一飲茶兼攞利是！
叻太起底
年齡：30以上40未滿
職業：全職家庭主婦
家庭狀況：家有老公及4歲囝囝