萬眾期待的iPad早前出台，只是坊間反應一般，有人話佢係加大碼iPhone，國內山寨廠更表示要告佢侵犯設計版權，睇嚟此機未能一鳴驚人。真正成功嘅其實係iPhone，3GS版推出半年有多依然大把人搶，日前SmarTone-Vodafone（簡稱數碼通）更正式賣埋一份，以後上台出iPhone，唔使獨沽一味用3仔。
數碼通此舉令3香港及PCCW立刻作出「回應」，一時鬥減價，一時鬥視頻內容，各台天天變招好睇過電視劇。然而，讀者最關心係邊個台最抵最好用，今次就為大家分析兼格價，好讓各位按需要出機。
鬥買機上台
此回合暫不理會任何增值服務，只計算兩台月費計劃的差異，簡單來說就是先從「錢」看。目前3香港提供五個月費計劃，數碼通則簡化為三個月費計劃，無獨有偶，兩者月費均相同，表列比較就最清晰。
3香港簽卡出機更平
用戶只需以DBS/COMPASS VISA信用卡簽帳購買iPhone 3GS手機，並簽訂為期24個月的免息分期，即可免預繳出機，並加送12個月無限本地數據用量及無限Wi-Fi。計落每月收費只需$285起，加上零預繳，出機慳番一大筆。
分析：3香港僅贏馬鼻
三個月費計劃當中，最大分別為最平嘅$138月費，3香港基本通話比對手多100分鐘，機價平$100，而數據收費上限又再平多$8，整體上較啱輕用量用家。至於中價$248及貴價$398月費，雖然兩台基本收費相似，但分別在3香港可以傾多100分鐘；32GB版畀少$20預繳；而且貴價Plan可豁免每月$12地鐵及牌照費，單計呢項兩年就慳多$288！簡單而言，今次3香港為搶客可諗計盡「縮數」，每處都贏對方少少，適合慳家人士使用。
鬥視頻內容
增值服務亦是各網絡商鬥法的一環，當中電視頻道更成為新戰場。繼數碼通大力推介高清HD Wide及IOM服務後，3香港亦不甘示弱，推出類似的直播視像頻道，加埋原先已有nowTV頻道的PCCW Mobile，真係睇電視都有排揀。
PCCW Mobile：內容最地道
背靠nowTV，節目自然最適合本地用家觀看，除有齊now新聞台、財經台、直播台及now香港外，還提供CNN、CNBC及9條now SPORTS體育頻道，後者會定期直播足球賽事，要用iPhone睇波只此一家，而且所有Web & Talk月費計劃睇高清台更完全免費，令低用量用戶都同樣受惠。
數碼通：畫質最靚
數碼通的IOM服務提供了更多網站嘅Flash短片，例如本報的on.cc及YouTube等，而且經過HD Wide處理，畫質幾達高清效果。直播視頻則由FoneTV提供，但當中以CNN、BBC等外國頻道為主，新聞台及娛樂台是別家製作，而且僅屬精華。收費方面，任何月費均送娛樂台，但要用HD Wide就需每月另加$18（$398月費除外），至於FoneTV及IOM收費則分別為$28及$18。
3香港：獨家有線頻道
被對手出廣告揶揄，3香港立即為iPhone提供視頻服務。獨家內容包括有線新聞台及有線財經台，兩者月費均為$8，財經台更會在每個交易日，直播財經報價及即市分析節目，方便用戶緊貼大市。其他頻道包括每月$18的有線資訊娛樂台，以及每月$25的NBA直播台等等。整體上雖然頻道唔夠人地多，但iPhone用家可自動升級睇高清版，總算是少少補償。
鬥帶機上台
另外，3香港及數碼通都有「帶機上台」計劃，連沒有iPhone賣的PCCW Mobile亦推出全新Web & Talk月費回贈優惠，務求吸引一眾已擁有iPhone的用戶轉台。由於各台的收費有差異，難以全部同場比較，考慮到轉台一為貪平，二為無限上網，因此這裏只挑選各台的最低月費，以及最基本的無限上網計劃作比較。
分析：PCCW上台最抵
這裏PCCW Mobile月費就低至$149，表面已經比數碼通平足$89，而且計落每月最低實收只係$99（$149-$900/18），雖然唔係無限上網，但真係極適合齋Talk唔上網嘅iPhone用戶。至於3香港最大優勢是毋須簽約兼享無限數據用量及Wi-Fi，唔想困身又經常上網的話，此計劃可謂全城最抵。相反，數碼通收費唔係最平，又唔可以將手機當Modem駁電腦使用，加上要簽約，定位有點兩頭唔到岸。
分析：上網狂揀3香港
大部分iPhone用家其實都預咗無限上網，若經常上網，3香港的月費可說是最抵用，而且免簽約，較對手更具彈性。PCCW Mobile係第二平，因為佢計埋回贈實收只係$232左右，通話分鐘亦起碼多過對手1,000分鐘以上，而且登記後可獲贈保護殼、保護貼及清潔布等配件，各方面都較為平衡。至於數碼通，情況跟最平月費計劃一樣，優勢唔突出。
鬥接收能力
看到這裏，似乎3香港及PCCW Mobile都各具賣點，反而數碼通就比較中庸，但後者號稱網絡最可靠，早已揚言不會跟對手鬥劈價。究竟數記係咪收得咁好？這裏便找來三個台作定點及移動時的連線測試，且看它能否扳回一仗。
測試方法︰
把三台SIM卡分別放入同一部iPhone 3GS來完成《Speed Test》測試，並計算開啟on.cc網頁的時間。每個項目各試三次，以平均時間作準。
測試內容︰
1) 西九龍Element定點測試，時間為2009/01/29下午11:30至14:30
2) 尖沙咀海港城定點測試，時間為2009/01/29下午11:30至14:30
3) 由旺角搭乘火車至紅磡站，期間作移動測試，時間為2009/01/29晚上18:30至19:30的繁忙時間
分析：數碼通速度最快
結果顯示，數碼通在海港城接收最佳，下載速度幾乎是對手的一倍，但去到西九龍則稍稍下降，反而3香港在這裏卻暴升三倍，最高更去到4.79Mbps，顯示3香港在網絡架設上稍具前瞻性。至於移動測試結果，三個台的接收力都大幅下跌，但當中仍以數碼通佔優，上on.cc速度更與定點時相若，難怪他們會以優質網絡作招徠。