新年流流查實唔太應該講鬼，但咁啱趕及在農曆新年前推出嘅《Dante's Inferno》故事特別，玩法又出位，惟有講句「Touchwood」，然後就繼續深入九層地獄挑戰死神。

中國人成日話地府有十八層，但呢套係西洋遊戲，故事藍本用上十三世紀意大利詩人但丁嘅文學巨著《神曲》，睇見每層地獄各有不同風格嘅場景、角色，加上特別編寫嘅地獄樂章，真係玩到唔停得手！

深入《神曲》九層地獄

《神曲》係但丁在公元1307至1321年所寫下嘅長詩，分為地獄、煉獄同天堂三大部分，《Dante's Inferno》就抽咗地獄篇中嘅九層地獄作故事藍本，由凌波煉獄（Limbo）、淫慾（Lust）、貪吃（Gluttony）、貪婪（Greed）、憤怒（Anger）、異端（Heresy）、暴力（Violence）、欺騙（Fraud）同背叛（Treachery）等組成。為咗要重現出九層地獄嘅面貌，開發小組花咗唔少時間去設計每個關卡嘅場景、角色同出場頭目，仲特別找來名作曲家Garry Schyman為遊戲譜寫「地獄樂章」，就算未睇過原著，打機都能感受到地獄嘅陰森氣氛。

將亡靈打到永不超生

故事講述身為十字軍嘅主角，返到佛羅倫斯後發現愛人Beatrice被殺，因而挺身闖入地獄救愛人，當中要跟眾多冤靈以至死神搏鬥。未入地獄前，主角要通過一個挑戰死神嘅小考驗，從而得到一把大鐮刀，再從愛人身上學會使用能將亡靈行動暫時「凍結」嘅十字架，然後就殺落地獄挑戰眾多冤靈。武器種類雖然唔算多，但主角會隨住戰鬥過程得到嘅經驗而學會新招式。當把亡靈打到就嚟魂飛魄散嘅時候，遊戲仲會畀少少時間玩家，考慮到底要令亡靈永不超生抑或進行救贖，前者會增加「邪惡」（Unholy）指數，後者會增加「神聖」（Holy）指數，睇吓大家想提升邊方面嘅技能。

「十八禁」場景設計

《Dante's Inferno》動作場面做得相當華麗，一來遊戲開發小組用番《Dead Space》出晒名嘅技術去處理角色動作，畫面更能以每秒60格顯示，高速打鬥場面都唔覺窒。除了只用武力同反應去劈低各層地獄嘅冤靈外，每個場景都會加入各自嘅謎題，要用吓腦先過到關。不過值得留意係呢套「十八禁」遊戲，雖然血腥程度唔算好誇張，但暴力同淫慾地獄嘅角色設計都有番咁上下，對部分玩家嚟講或者會係一個賣點。

遊戲資料

類型：動作冒險 開發：Visceral Games / Electronic Arts

平台：PS3、Xbox 360 推出日期：2月9日

售價：$329（Xbox 360，普通版）

$349（Xbox 360，特別版）

$399（PS3，特別版）

查詢：3166 6001

新作速遞

《MAG》256人網上開戰

顧名思義，《MAG》（Massive Action Game）係玩大堆頭戰爭，最高可支援到128人對128人嘅大規模射擊對戰，誇張到極。《MAG》由開發《SOCOM》嘅Zipper Interactive開發，水準有保證，仲可以使用70種武器及多種武裝載具打現代戰，真實感強。

類型：射擊　平台：PS3　推出日期：已推出　售價：$358

「星海4」加料冧PS3機主

相比一年前嘅Xbox 360版《Star Ocean 4：The Last Hope》，今次轉到PS3上推出嘅International版，除收錄包括日文、英文等六國語言及日、英語音外，仲聽從玩家意見，加入3D CG版人物選單及戰鬥介面，並將戰鬥部分嘅鎖定目標功能簡化，係PS3 RPG迷農曆新年煲機大作。

類型：角色扮演　平台：PS3　推出日期：2月4日　售價：$548　　　

查詢：2341 2356