本來情人節好應該二人世界,但又係大年初一,所以我決定朝早就去拜年,夜晚就放低囝囝畀叻婆婆,同C6浪漫一吓!一年得一次咋,點可以馬虎了事,我已經精選咗幾間特色酒店套房優惠,過番個溫馨浪漫嘅情人節,依家同大家Share吓啦!
身為家庭主婦,我明白好多事應以家庭為先,但係情人節呢一日,自私啲都不為過喎!
雪糕迷情
雪糕大家成日食,但整晚陶醉於雪糕世界又點睇?都會海逸酒店推出Haagen-Dazs主題套房,整間房陳設均以品牌獨有嘅酒紅色裝飾,包括梳化、床品、餐具、家居裝飾及掛畫等,夠晒Romantic。房內特別設有雪糕專櫃,內有五至七款味道共十杯雪糕免費任食,仲額外送上有汽葡萄酒、士多啤梨,同埋雪糕優惠券或小禮物兩套。另外,套房優惠包括免費西餐廳自助早餐(兩位成人),或享千鶴日本料理八五折優惠。大家仲可以免費使用健身中心、桑拿設備、恒溫水力按摩浴池同室外泳池添!
都會海逸酒店Haagen-Dazs
主題甜蜜住房套餐
優惠期:即日至2月28日
住宿收費:$1,488/晚(另加一服務費)
查詢:3160 6822
幸福人辦陳慧琳親自設計嘅情人節精品,我係太太都冧呀!
雖然已經做咗媽咪,兼且有個幸福家庭,但內心不知幾咁少女,點知尋晚隻蠢老公仲話要送條Scarf畀我做情人節禮物喎,激死!其實我一早睇中咗香港迪士尼樂園全新嘅情人節精品系列,佢哋同幸福天后陳慧琳合作,設計咗「K×M」系列情人節精品,Kelly以今年大熱嘅桃紅色及黑色為主色,配以Bling Bling閃石,又Sharp又Fancy。C6,我畀晒Signal你啦,唔好再問我啦!
有機護膚品優惠
個個都知有機產品對身體好,表妹Judy送咗罌Juice Organics嘅維他命蜜潤面霜畀我,原來佢係嚟自美國加州嘅護膚品牌,產品以百分百全天然有機鮮果維他命研製而成,旗下嘅Nourishing系列好似維他命滋潤潔膚乳、維他命修護精華同埋維他命蜜潤面霜都係冬季王牌。即日至2月28日喺屈臣氏購買相關產品更可獲七五折優惠,好喎!
查詢:2833 5178
麥嘜陪你
唔出門但又想有度假Feel?黃金海岸酒店係好選擇。佢哋請咗麥嘜同麥兜陪你過情人節,推出「情約在黃金」情人節住宿優惠,住客可入住高級海景客房一晚,並於聆渢咖啡廳或漪泉吧歎自助晚餐,其餘優惠包括酒店食肆八折優惠、免費使用游泳池及健身室、穿梭巴士由酒店往返尖沙咀、荃灣或青衣等。凡於2月13至14日或27至28日入住的住客,更可獲得麥嘜、麥兜禮品一份,麥嘜同麥兜更會逢周六、周日及公眾假期下午親自同大家見面添!
「情約在黃金」住宿優惠
優惠期及住宿收費:2月13至14日 $1,680/晚
:2月27至28日 $1,480/晚
(已包括10%服務費及現行政府稅)
查詢:2452 8662
鬧市抵玩
如果唔想去咁遠,尖沙咀九龍酒店响情人節當日提供住宿優惠,千零蚊就可入住高級客房,仲可享用自助早餐及葡萄汽酒。另外,每對去倚窗閣餐廳享用自助晚餐嘅情侶,均可獲贈一盒價值$138嘅法式杏仁餅Macaron,總之甜甜蜜蜜、心心相印啦!
九龍酒店情人節住宿優惠
日期:2月14日
住宿收費:$1,188/晚(另加一服務費)
倚窗閣情人節自助晚餐
日期:2月14日
收費:首席5:45pm至8:00pm 成人$498、小童$338
:次席8:30pm至10:30pm 成人$498、小童$338
查詢:2734 3777
有好嘢!情人節住宿優惠!
K×M情人節精品,好冧!
叻太起底
年齡:30以上40未滿
職業:全職家庭主婦
家庭狀況:家有老公及4歲囝囝