冬天一到，身邊朋友個個都手凍腳凍，唔想攬住暖水袋做人？不妨試吓保健湯水。

讀書時，朋友Kelly出晒名手凍腳凍，綽號「凍柑人」，今日同佢傾電話又重提舊事，點知Kelly話：「依家唔同啦！事關我睇中醫調理好身體。註冊中醫師同我講，手腳容易冰冷、麻木，多數係氣血嘅毛病，因為氣虛、血虛造成血液運行不暢、血液量不足，多進食人參、黨參、當歸等可改善及預防手腳冰冷。醫師仲建議，對於我呢類冬天容易手腳冰冷嘅人，最好少食生冷水果及冷飲，平日仲要多做運動添！」聽佢講到咁好，立即叫佢e兩款湯水畀我，咁有好嘢梗公諸同好啦！

黃芪老鴿湯

用料：黨參五錢、黃芪五錢、川芎三錢、當歸三錢、茯苓五錢、白朮四錢、白芍五錢、大棗四枚、老鴿二隻

五味瘦肉湯

用料：補骨脂三錢、黃芪八錢、五味子三錢、白朮四錢、淮山四錢、肉豆蔻二錢、瘦肉半片

做法：將材料洗淨放進煲內用文火煲兩小時即可。

鳴謝：康和堂註冊中醫師任立新

貓咪奧運會前哨戰

朋友Peggy係貓癡，佢最近訓練隻貓參加奧運會，乜貓貓都有奧運會？原來佢隻貓前排响荷里活廣場進行預賽，入圍後現再接受訓練，準備參加總決賽爭冠軍，而冠軍貓將會代表香港首次參加明年响美國舉行嘅國際貓咪競技大賽。總決賽嗰兩日，响賽事以外嘅時間會開放比賽場地，畀其他貓貓享受呢個全港最大型「貓之競技樂園」，等我哋帶埋囝囝去見識吓啲競技貓，順便幫Peggy隻貓打氣啦！

「冠軍貓展」

日期：1月23及24日

時間：11:00am至7:00pm

地點：荷里活廣場

查詢：2118 8811

愛情果煥白肌膚

同學仔媽咪Joey最近試做Perfect Concept嘅愛情果療程，以有機番茄、芝麻、大米及藜麥作面膜材料，有效消除倦容，令肌膚回復水潤。咁愛情果係咩呢？原來番茄嘅拉丁文係「愛情果」，因為佢不但外表吸引，亦含有好多營養，包括維他命A、維他命B、維他命C，仲有對抗細胞氧化、有助細胞修補等作用嘅茄紅素。見Joey塊面真係豆腐咁滑，一於去試吓！

愛情果煥白護理療程

原價$580、試做價$230

查詢：2626 3066

叻太推介：社企生日會服務

陪囝囝去同學仔嘅生日會，大人細路都玩得好開心，要籌備一個成功嘅生日會或派對一啲都唔簡單，事前事後要準備好多嘢，場地、食物、禮物、表演及安排攝影等，仲要分身招呼朋友，真係好鬼煩！原來香港聖公會麥理浩夫人中心家庭活動及資源中心新開設咗一站式生日會服務，有專人幫你安排所有服務，而呢項服務亦係社會企業服務之一，好有意義啊！

「溫情歡暢賀生辰」生日派對服務

收費：$88/位（最少20人）

主辦：香港聖公會麥理浩夫人中心家庭活動及資源中心

查詢：2423 5045

手腳冰冷？唔怕，我有辦法！

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝