CES落幕不到一個星期，多款展出的新產品都陸續運到香港搞發布會，當中就包括兩款業界首創、能拍到AVCHD全高清影片的Cyber-shot數碼相機TX7同HX5V；引得藝人李思雅（Cindy）都嚟趁熱鬧試玩，仲大讚新機鏡頭夠闊兼有好玩嘅一掃全景模式，打Golf或去旅行影風景就最啱。

問起Cindy兩部新機要二擇其一會點揀？佢就鍾意樣靚機薄嘅TX7多啲，但係筆者就揀有10倍變焦鏡頭連GPS同指南針功能嘅HX5V，外遊時就真係實用好多！

TX7內置臉孔偵測及一笑即拍功能，Cindy自拍冇難度。	變焦轉盤設於機角位置，男生們使用時有些難度。	TX7會推出三款顏色機身。

智能TX7 全景駁相

TX7的功能同規格都較上一代TX1提升咗唔少，首先包括用上一支廣角達25mm嘅內置式蔡司鏡頭，比起TX1嘅35mm鏡頭進步咗好多，而所採用的Exmor R CMOS感光元件，在夜間拍攝時亦冇其他機仔產生咁多雜訊，更備有高動態範圍背光修正功能，唔怕過分曝光或曝光不足。講到好玩，又點少得Cindy試完都讚嘅一掃全景模式，只要開動模式，然後用家原地自轉一圈，相機就會自動合成出一張全景相，而且今次新智能一掃全景模式，還可配合臉孔辨識同動態偵測功能，好似想拍低Cindy揮桿打高爾夫球時嘅全景相，都唔會出現手腳唔銜接嘅情況。

採用輕觸式顯示屏；另亦內置AVCHD全高清攝錄功能。	既可拍到全高清AVCHD影片，亦能憑設於機面的收音咪作立體聲收音。	HX5V $2,990預計三月中推出

AVCHD 全高清拍片

唔玩影相用來拍片都一樣得，TX7更係業界首部拍到AVCHD格式全高清影片嘅DC，最高解像度去到1,920×1,080i，絕對可以帶少部DV Cam出街。此外，TX7都有其他好玩之處，例如換上新TruBlack技術嘅3.5吋Xtra Fine輕觸式屏幕，除可直接在畫面上選取功能外，亦較容易在室外睇清楚色彩的變化，同時亦能夠兼容Party-Shot玩自動追人拍攝。值得一提係TX7已經唔再只係支援MS DUO系記憶卡，SD或SDHC卡都一樣用得着。

HX5V機身輕巧，但已配備25-250mm 10倍變焦G Lens鏡頭。	透過GPS同指南針功能，一睇就知道Cindy去咗機場旁邊嘅高爾夫球場打波。	由於在酒店室內拍攝，會見到圖中的GPS圖示未能接通，但旁邊的指南針仍然可用。

TX7內置臉孔偵測及一笑即拍功能，Cindy自拍冇難度。

大部分功能都可在功能轉盤上揀選，操作容易。

Zoom盡時鏡頭凸出部分都不太誇張。

機檔案

影像感應器：1/2.4吋1,020萬像素Exmor R CMOS

鏡　　　頭：25-100mm F3.5-4.6蔡司4倍變焦鏡頭

儲　存　媒　體：MS Duo、MS PRO Duo、SDHC、SD、內置45MB

體　　　積：97.8×59.5×17.5mm

重　　　量：133g

HX5V內置 GPS及指南針

筆者周不時去旅行，除咗要揀合適的鏡頭焦距外，最頭痕嘅係轉頭已唔記得張相喺邊度影，好在HX5V配備一支25-250mm 10倍變焦G Lens鏡頭，滿足晒廣角及遠攝要求之餘，仲加入GPS功能，在戶外拍攝時可以記錄埋地理坐標，影完入落電腦就可睇番影相嘅位置；而且HX5V仲先進到加埋指南針功能，連影相時嘅方向都偵測到，更加唔怕搞錯。

配DV級 防震系統

HX5V同樣支援全高清AVCHD影片攝錄模式，不過由於機身輕巧（只有170g），如果手持Zoom盡拍片都幾容易手震，所以今次就內置埋只會在DV Cam上出現嘅動態模式光學防震系統，行住拍都唔怕影像震到頭暈眼花。HX5V所用嘅G Lens鏡頭成像力都唔錯，配合雜訊較少嘅Exmor R CMOS，影像質素都幾有水準；同時亦支援智能一掃全景、高動態背光修正功能，實用又好玩。

查詢：2345 2966